Shir looga hadlayo xaalada Soomaaliya oo maalinta berri ah ka furmaya magaalada Kampala
Khamiis, Maarso, 01, 2018 (HOL) – Maalinta
berri ah ayaa lagu wadaa in magaalada Kampala ee caasimada dalka Uganda uu ka
furmo shir looga hadli doono xaalada Soomaaliya.
War ka soo baxay Wasaaradda Arrimaha Dibadda Uganda ayaa lagu sheegay in
Shirka ay isugu imaanaya madaxda dowladaha ay ciidamada ay ka joogaan
Soomaaliya gaar ahaan ciidamada Midowga Africa ee AMISOM.
Madaxweynaha dalka Uganda Yoweri
Museveni,ayaa marti-gelindoona shirka oo berri ka furmaya Kampala, waxaana la
filayaa iney ka qeyb-galaan madax heerkeedu sareeyo,sida Wakiilo ka socda
Guddiga Midowga Africa,Xubno ka socda Qaramada Midoobay,Midowga Yurub,Xubno ka
kala socda Gobolka iyo Ururro caalami ah iyo Wakiilo metalaya Shanta xubin ee
joogtada ka ah Golaha amaanka ee Qaramada Midoobay.
Shirka ayaa inta uu socdo diirada lagu saari doono qaab gunaanadka shirkii
bishii September ee sanadkii 2017-dii lagu qabtay magaalada New York ee dalka
Mareynkanka,waxaana shirka New York uu ahaa mid la isku aragti dhaafsanayay xaaladda
Soomaaliya, Mustaqbalka Ciidamada Midowga Africa ka jooga Soomaaliya ee AMISOM
iyo waliba hanaanka Kumeel gaarka ah ee Ciidamada Dowladda Soomaaliya kala
wareegi karaan amaanka guud ahaan dalka Ciidamada AMISOM.
Shirka 2-bisha March maalinta berri ah ka furmaya agaalada Kampala ayaa abuuri kara fursad ah in si qoto dheer looga
wada xaajoodo Marxaladda Soomaaliya,doorka dalalka ciidamada ay ka joogaan
Soomaaliya,joogteynta habka ugu haboon ee maalgelinta AMISOM iyo Waxqabadka
xaaladda kala guurka ee AMISOM.
Ciidamada dowladda Soomaaliya ayaa loo diyaarinayaa sidii mas’uuliyadda
amaanka dalka ugala wareegi lahaayeen ciidamada AMISOM oo mudo sanado ah
jooga,kuwaasi oo ciidamada xoogga dalka ka taageeraya dagaalka ka dhanka ah Ururrada
Argagixisada.
C/raxmaan Diini, Hiiraan Online
[email protected].
