Jimco, June, 08, 2018 (HOL) - Wafdi uu hogaaminayo ra’iisal
wasaaraha Soomaaliya Xassan Cali Khayre oo ku sugan dalka
Jabuuti ayaa kulan la qaatay ra’iisal wasaaraha dalkaas, Cabdiqaadir Kaamil
Maxamed iyo qaar ka mid ah golihiisa wasiirada.
Kulanka intii uu socday ayaa la isla-gartay in
labada dal ay iska caawiyaan arrimaha ay ka mid yihiin xoojinta ammaanka, hagaajinta
xariirka arrimaha dibadda, ka faa’iideysiga kheyraadka iyo in Jabuuti ay
Soomaaliya ka taageerto dhanka Isgaarsiinta.
Ra’iisal wasaaraha Soomaaliya ayaa ka sheekeeyay
wada shaqaynta wanaagsan ee ka dhaxaysa labada dawladood, waxa uuna walaalaha
Jabuuti ku bogaadiyay sida ay mar walba u caawiyaan shacabka Soomaaliyeed oo uu
sheegay in ay tahay abaal ay u hayso dawladda Soomaaliya mar walba aan ka go’i
doonin qalbiyada shacbiga Soomaaliyeed.
Kulanka labada mas’uul waxaa goob joog ahaa
xubnaha wafdiga ra’iisul wasaare Khayre oo ay kamid yihiin wasiirka arimaha
Dibadda, Mudane Axmed Ciise Cawad, Wasiirka Boostadda iyo isgaarsiinta, Eng.
Cabdi Canshuur Xasan, Wasiir dowlaha wasaaradda Gaashaandhiga, Mudane Maxamed
Cali Xagaa iyo mus’uuliyiin kale, iyada oo dhanka Jabuuti ay uga qeyb galeen wasiirada
wafaafinta iyo isgaarsiinta, gaashaadhingga iyo arrimaha dibadda.
Ra’iisul wasaare Khayre iyo wafdigiisa ayaa kulanka kaddib booqday xarunta
Fiber optica ee dalka Jabuuti.
C/raxmaan Diini, Hiiraan
Online
[email protected]
