Isniin, June, 25. 2018 (HOL) - Madaxweynaha
Somaliland Muuse Biixi Cabdi, ayaa ka hadlay waraaq Soomaaliya u qortay beesha
caalamka oo ay ka dalbanayso in dhaqaalihii gaarka loo siin jirey laga joojiyo.
Waxaanu sidaas ka sheegay kormeer kadis ah oo uu
ku tagay wasaaradda Maaliyadda, waxaanu ku guubaabiyey in dhaqaalaha kor loo
qaado.
“Dhibaatada jirta waxa inoo dheer dagaalka
Soomaaliya inoo dhexeeya oo muddadii 27-sano ahayd ee aynu qaranka goonnida isu
taagay ahayd dagaalka ay inala galeen baa ka weyn 30-kii sano ee hore dagaalkii
naf iyo maalba lahaa ee ay inala galeen, iyada oo marka horeba aanay sadaqo wax
lagu faano ahayn oo ay ceeb iyo yax-yax tahay inaynu baryo ku hadalnaa, ayaa
haddana tii (Deeqdii) lafteedii la isugu yimi oo waxa ay yidhaahdeen waxan yar
ee Somaliland aad siinaysaan yaan la siinnin, qolada wax bixinaysaana waxa ay
yidhaahdeen ma ahee sidoodii aanu ku wadno, saakana Afartii gobol qoraal bay
wada saxeexeen ah Somaliland yaan waxba la siinin, waxaas oo dagaal ahna waxa
aynu kaga baxaynaa innaga oo Ilaahay maskaxda uu ina siiyey iyo awooddeena ka
faa’iidaysanna.”ayuu yidhi Biixii oo ka hadlayey qoraalo Soomaaliya u qortay
beesha caalamka.
Madaxweynuhu mar uu ka hadlayey shaqadda laga
rabo wasaarada Maaliyadda waxa uu yidhi “Maaliyadda waxa laga doonayaa oo
umaddu idinka doonaysaa inaad hal koox (One team) noqotaan oo ay fikrad
ballaadhan abuurto oo isu tagto, waanan idiinkaga mahadnaqayaa horumarka aad
samayseen, innagana laba hal baa la inaga rabaa inaynu saxno, inaynu kii
lacagta hayey ku dhiirrano wixii sharcigu ku waajibiyey iyo inaynu waxa aynu
kaas lacagta haya kasoo qaadnay aynu caddayno inaynu gaadhsiinnay kii faqiirka
ahaa oo aan la ina odhan dhexdaad ku lunsanaysaa,”
Dhinaca kale,Wasiirka Maaliyadda Yuusuf Maxamed
Cabdi ayaa ka warbixiyey shaqadda wasaaradda, isla markaana sheegay in
shaqaalaha wasaaraddu labadda galinba shaqeeyaan.
“muddadii aanu joognay waxa aanu aad xoogga u
saarnay kobcinta dakhliga qaranka oo aanu maamulkii cashuurraha dib u eegin iyo
dib-u-habayn dheer ku samaynay, welina aanu wadno iyo cashuurradaha berriga oo
iyagana aanu doonayno inaanu aad xoogga u saarno”ayuu yidhi wasiirku.
Barkhad-ladiif M. Cumar,
Hiiraan Online
[email protected]
Hargeysa, Somaliland.
