Ra'iisul wasaaraha Soomaaliya oo Qardho kulan kala qaatay Boqor Burhaan iyo Beeldaaje Maxamed
Talaado, July, 31, 2018 (HOL)- Ra'iisul
wasaaraha Soomaaliya, Xasan Cali Khayre oo booqasho ku jooga Puntland ayaa
maanta safar dhulka ah ku gaaray degmada Qardho , halka oo ay dadweyne
badan ku soo dhaweeyeen.
Ra'iisul wasaare Khayre, ayaa
ku ammaanay bulshada ku nool magaalada Qardho iyo dhammaan Puntland soo
dhawayta ay ka muuqato jacaylka horumarka iyo Dawladnimada, wuxuuna kulamo la
qaatay boqor Burhaan boqor Muuse iyo Beeldaaje Maxamed Beeldaaje Ismaaciil
Beeldaaje Cabdullaahi oo ay ka wada hadleen arrimo ku saabsan horumarka
bulshada, nabadeynta iyo taageerrada dawladda Federaalka Soomaaliya.
Boqor Burhaan boqor Muuse Iyo
Beeldaaje Maxamed Beeldaaje Ismaaciil Beeldaaje Cabdullaahi ayaa u ballan
qaaday ra'iisul wasaaraha Soomaaliya in dhaqanka Puntland ay sii wadi doonnaan
hawlaha lagu garab istaagayo horumarinta qaranimada iyo sharafka ummadda
Soomaaliyeed,iyagoo ku dhiirigaliyay xukuumadda shaqada wanaagsan ee
horumarinta rejada dawladnimada Soomaaliyeed.
Gabagabadii, ra'iisul
wasaaraha ayaa uga mahadceliyay Marti-soorka iyo Qaabilaadda hufan Boqor
Burhaan Boqor Muuse Iyo Beeldaaje Maxamed Beeldaaje Ismaaciil Beeldaaje
Cabdullaahi.
Iman Mohamed Jama, Hiiraan Online
[email protected]