Talaado, July, 31, 2018 (HOL)- Ciidamada
Amniga ee Gabiley Somaliland, ayaa qabtay Hilib gaar ahaan Beer iyo Kalyo
laga soo galiyey dhinaca Itoobiya oo loo soo waday magaalada Hargeysa.
Kaantaroolka Bari ee magaaladda Gabiley ayaa lagu
qabtay Beer iyo Kalyo aan la garanayn nooca uu yahay, hasse ahaatee waxaa la hayaa
ninkii gaadhiga ku siday oo xabsiga loo taxaabay.
Beerkan iyo kalyahan ayaa la sheegay in Itoobiya
laga keenay, hasse ahaatee in ay xoolo yihiin iyo in ay wax kale laga soo jaray aan
ilaa hadda la garanayn, waxaana ciidanku xuseen in la baadhayo,isla markaana la
gubay Beerkii.
Beerkan iyo Kalyahan ayaa kartoomo iyo baco lagu
soo xidhxidhay, waxaana la sheegay in lagu soo waday Hargeysa, waxaanu ciidanku
sheegay in kartoomada ay ku qoran yihiin numarka qofka loo waday oo lagu
ballansanaa in duleedka magaaladda lagala wareego Hilibkan.
Mas'uuliyiinta dawladda hoose ee Gabiley iyo
wasaaraddaha xanaanada xoolaha iyo caafimaadka ayaa iyaguna ka dayriyey
caafimaadka beerkan iyo Kalyan sida koontarobaanka ah lagu soo galinayey
magaaladda Hargeysa.
Barkhad-ladiif M. Cumar, Hiiraan Online
[email protected]
Hargeysa, Somaliland.
