Bandow lagu soo rogay magaalada Jigjiga ee xarunta dowlad deegaanka Soomaalida Itoobiya
Arbaco, July, 25, 2018 (HOL) -Ciidamo
aad u hubeysan ayaa la soo dhoobay magaalda Jigjiga kaddib rabshado saacadihii
ugu danbeeyay ay ka dhigeen magaalada dad u badnaa dhalinyaro ka cabanaya
maamulka dowlad deegaanka Soomaalida Itoobiya ee uu horkacayo madaxweyne Cabdi
Maxamuud Cumar.
Dad u badan dhalinyaro ayaa la
arkayay maalintii shalay iyaga oo isugu soo baxay dariiqyada magaalada Jigjiga
kuna qeylinaya erayo ka dhan ka ah maamulka dowlad deegaanka Soomaalida,
dhinaca kalana dalbanayay in la sii daayo dadka wali ku xir xiran xabsiyada
Jigjiga gaar ahaan xabsiga lagu magacaabo Jeel Ogaadinaya.
Horay maamulku wuxuu u sheegay in
gabi ahaanba la xiray Jeelkan oo ahaa ugu ballaaran oo ay ku xir-xirnaayeen
dadka loo heysto arrimaha siyaasada ee xiriirka-na la leh Ururrada mucaaradka.
Balse dadkan cabanaya ee
rabshadaha ka dhagay Jigjiga ayaa ku doodaya in ay wali jiraan dad ku jira
gacanta maamulka, islamarkaana loo geysanayo tacadiyo kala duwan.
Maamulka ayaa amray in xiliyada
habeenkii aan wax dhaqdhaqaaq ah laga sameyn karin magaalada oo lagu arkayo ciidamo
aad u hubeysan oo amaanka sugaya.
C/raxmaan
Diini, Hiiraan Online
[email protected]