Ururka Cilmi baadhista Soomaaliyeed oo shirkoodii maanta uga furmay Jaamacadda Hargeysa
Isniin, July, 23, 2018 (HOL) – Ururka
Cilmi Baadhista Soomaaliyeed (SSIA) ayaa shirkiisii 13aad maanta uga
furmay jaamacadda Hargeysa, kaasi oo ay ka soo qaybgaleen in ka badan boqol iyo
konton aqoonyahan oo iskugu jira Soomaali iyo Ajanabi.
Shirkan
cilmi baadhista Soomaalidda ayaa markii labaad lagu qabtay magaaladda Hargeysa,
waxaana lagu soo bandhigi doonaa lixdan daraasadood oo soomaalida
laga qoray, waxa kale oo lagaga doodi doonaa wada hadalka Somaliland iyo Soomaaliya,
arrimaha qurbo joogta iyo qodobo badan oo kale.
Shirkan
cilmi baadhista Soomaaliyeed ayaa saddexdii sannaba mar la qabtaa, waxaanay
Jaamacadda Hargeysa ugu bushaaraysay in jaamacadda dhexdeedda ay xafiis ka
siinayso ururkan.
“maadaama
oo warbixino kala duwan laga soo jeedinayo oo dhinacyo kala duwan taabanysa waa
in la isku dul qaado oo dhinacyada ay taaban karto u dulqaataan waayo
Soomaalidu waxay tidhaahda maan rag waa muducyo afkeed waa la is khilaafayaa,
waxaana soo jeedinayaa inay wax badan ka soo baxaan oo laga faa’iido
shirkan”ayuu yidhi gudoomiyaha jaamacadda Professor Maxamed Yuusuf
Muuse
Wasiirka
warfaafinta iyo wacyigelinta Cabdiraxmaan Guri Barwaaqo oo isagu shirkan furey
ayaa sheegay in shirkani noqonayo shirkii 2aad ee Hargeysa lagu qabto, waxa
kale oo uu xusay in dalal kala duwan lagu qabtay shirkan cilmi baadhista
Soomaaliyeed.
“Waxa
jooga 25 dal oo aduunka ah, waana fariin caalamka loo dirayo inay Somaliland
tahay mid madax banaan oo nabadgalyo ah, ka soo qaybgalayaaash ajanabiga ah
waxaan doonaya inay caalamka naga gaadhsiiyaan inay Somaliland nabad
tahay oo wakhti walba la soconayo”ayuu yidhi Guri-barwaaqo.
Wasiirku
waxaa uu intaas raaciyey in ka soo qaybgalayaashu yihiin 150 aqoonyahan oo
iskugu jira soomaali iyo ajanabi.
Waxa kale
oo iyaguna halkaasi ka hadlay aqoonyano badan, kuwaas oo ku dheeraadda cilmi
baadhista Soomaalidda oo ay tilmaameen in dhinacyo badan wax laga qorey.
Barkhad-ladiif M.
Cumar, Hiiraan Online
[email protected]
Hargeysa,
Somaliland.