Dowladda Soomaaliya oo sheegtay in shirkii Brussels Soomaaliya loogu deeqay 1.2 billion oo Euro
Axad, July, 22, 2018 (HOL)–Dowladda Soomaaliya ayaa
gabi ahaanba soo dhaweysay qodobadii ka soo baxay shirkii Brussels ee Iskaashiga
Soomaaliya oo ay ka qeybgaleen madaxda ugu sareysa dalka Soomaliya iyo wafuud
ka kala soctay beesha caalamka.
War ka soo baxay Wasaaradda
arrimaha dibedda Soomaaliya ayaa lagu sheegay in in dowladdu ay soo dhaweynayso
in dalalka iskaashiga Somalia la lihi ay sheegeen in ay Somalia ku yaboohayaan
1.2 billion oo Euro ah.
Sidoo kale dowladda Soomaaliya
ayaa intaa ku dartay in ay soo dhaweynayaan hadalkii ka soo yeeray ee uu shirka
ka dhax sheegay danjiraha Imaaraatka Carabta u fadhiya dalalka Belgium iyo
Luxemburg ee ahaa in Imaaraadka ay ka go’an tahay taageerida dadaalada lagu soo
celinayo midnimada, amniga iyo xasiloonida Somalia iyo in wax laga qabto
caqabadaha amniga, siyaasadda iyo horumarinta Somalia.
Soomaaliya iyo Imaaraadka
waayadii ugu danbeeyayba xiriirkoodu ma wanaagsaneyn, hasse ahaatee waxaa
muuqata in markan Imaaraadku doonayo in uu soo celiyo cilaaqaadkii labada
dowladood.
Dawladda Somaaliya ayaa sheegtay in Imaaraadka ay
ku raacsan tahay dhismaha nabada gobolka iyada oo taas la eegayo, ayaa dawladda
Somalia sheegtay, in ay soo dhaweynayso fursad kasta oo lagu horumarin karo
agendahan istaraatiijiga ah.
Shirka Brussels ayaa qodobada ka
soo baxay waxaa ka mid ahaa in si toos ah markan kaalamada dhaqaale ee caalamku
ku deeqo loogu shubi doono Bankiga dhexe ee Soomaaliya, iyadoo uu jiro doono
daba-gal xoog leh oo la xiriira sida loo isticmaalayo dhaqallahaas.
C/raxmaan
Diini, Hiiraan Online
[email protected]
