Axad, July, 01, 2018 (HOL) - Shir uga socday
beel ka mid ah beelaha Somaliland deegaanka Buurta Gacan libaax ee gobolka
Saaxil ayaa maanta la soo gabogabeeyey, waxaana laga soo saaray qodobo.
Shirkan waxa uu u socday beesha Garxajis oo ka
mid ah beelaha Somaliland, waxaanay muddo toban cisho ah ku shiraayeen
deegaanka Buurta Gacan libaax ee gobolka Saaxil, kaasi oo ay iskugu yimaadeen
madax dhaqameed, aqoonyahano, qurbo joog , siyaasiyiin, haween iyo dhalinyaro,
kana tashanayey arrimo khuseeya beeshoodda.
Waxaana gabogabadii ka soo baxay qodobadan:
1. In Midnimada In Garxajis ay
ka tahay midka koowaad .
2. In Saami qaybsiga dawlada uu yahay
mid aan cadaalad ku dhisnayn
3. In Kootada qandaraasyada
dalka cid gaara ah la siiyo.
4. In Sinaanshiiyo la’aan ay beeshu ka
tirsaneyso shaqaalaha dawlada, ciidamada , saraakiisha ciidamada iyo
wixii la mid ah.
5. In beelaha Somaliland oo dhan lala shiro si
dib loogu soo noqdo Axdi qarameedkii iyo dastuurkii lagu heshiiyay.
6. In la furo dastuurka dalka si beelaha
darafyadu uga Qayb qaataan dawlada Hogaanka dalkana loogu sinaado.
7. Beeshu waxay cadaynaysaa in labadii xukuumadeed
ee iska dambeeyay aanay dhex ka ahayn colaaada Ceel Afweyn ,Waxaana ay ku
eedeeyeen in qaaar ka mida wasiirada xukuumada Muuse sii hurinayaan
colaaadaaas.
8. Waxaanu ka digaynaa in Beesha lagu sheego
Qaran Dumis, maadaama beeshu ahayd bud dhigii xoraynta dalka dad badana kaga
dhinteen.
Barkhad-ladiif M. Cumar, Hiiraan Online
[email protected]
Hargeysa, Somaliland
