Shirkii Golaha Wasiiradda Somaliland oo maanta lagaga dooday dagaaladii ka dhacay Tuko-Raq
Khamiis, Janaayo, 11, 2018 (HOL) - Khamiis,January 11,2018 (HOL)- Shirkii golaha
Wasiiradda Somaliland ayaa maanta lagaga dooday xiisadda ka soo cusboonaatay
deegaanka Tukko Raq, waxaana laga soo saaray go’aan ah in la ilaaliyo
xuduudda,isla markaana aan cidna laga ogolaan inay ku soo xadgudubto taako ka
mid ah dhulka Somaliland.
Kalfadhigii saddexaad (3aad) ee ay yeeshaan golaha wasiirada
Somaliland oo uu shir-gudoominayey Madaxweynaha Somaliland, Mudane Muuse Biixi
Cabdi kuna wehelinaayey madaxweyne ku xigeenka Somaliland, Mudane Cabdiraxmaan
Cabdilaahi Ismaaciil Saylici ayaa dood-dheer iyo falaqayn ay ka yeesheen
xaaladda guud ee dalka iyo arrinta ka soo cusboonaatay Gobolka Sool, gaar ahaan
deegaanka Tuka-raq oo Dawladda Soomaaliya iyo Maamulka Puntland lagu eedeeyey
inay iyagoo isgarabsanayaa ay ku soo
gardaroodeen xadka Somaliland.
Waxaana shirkaasi golaha wasiiradad laga soo saaray go’aanadan:
1. In dawladda Somaliland, siday horeba u sheegtay ay ka go’antahay
in ay ilaalinayso xuduudaheeda, ogalaan doonnina in taako ka mida dhulka Somaliland lagu soo
xadgudbo.
2. In ay dawladda Somaliland u cadaynayso Wadamada
deriska ah iyo Beesha Caalamkaba, inay ka go’an tahay nabad ku wada
noolaanshaha iyo ilaalinta xasiloonida mandaqadda.
3. In Golaha Wasiirada Jamhuuriyadda Somaliland ay
si buuxda u taageeraan, isla markaana ay is garab taagayaan Ciidanka Qaranka ee
tallaabada geesinimada leh ku dhaqaaqay, kuna hawlan sidii uu u sugi lahaa
xuduudaha Somaliland.
4. In ay Golaha Wasiiradu si buuxda u bogaadinayaan
go’aankii labada gole ee Guurtida iyo Wakiilada
ee xaaladda jiida hore.
5. In guddida dhaqaalaha iyo horumarinta ee Golaha
Wasiiradu ay soo darsaan, go’aanna ka soo gaadhaan sidii loo xoojin lahaa wada
shaqaynta hay’adaha caalamiga ah, soona qiimeeyaan shaqooyinka ay hayaan
ajaaniibtu, ee ay qaban karaan xirfadlayaasha Muwaadiniinta ahi.
6. Ugu danbayn waxa goluhu isku raacay
qaab-dhismeedka guddi -hoosaadyada Golaha Wasiiradu uu yeelanayo oo ah sidan.
a. Guddida
Nabadgalyada 5 wasaaradood
b. Guddida Dhaqaalaha iyo
Horumarka 9 Wasaaradood
c. Guddida Arrimaha
Bulshada 9 Wasaaradood
d. Guddida Arrimaha Dibedda iyo
Ictiraaf-raadinta 6 Wasaaradood
e. Guddida Cadaladda iyo Shuruucda
dalka 6 Wasaaradood
Iyadoo ay wasaaraddaha qaar ka mid yihiin wax ka badan hal
guddi-hoosaad oo kor ku xusan.
Barkhad-ladiif M. Cumar, Hiiraan Online
[email protected]