Khamiis, Feberaayo, 22, 2018 (HOL) - Wararka
ka naga soo gaaraya gobolka Gedo ayaa sheegaya in dagaal culus uu halkaa ku
dhaxmaray ciidamada dowladda oo gacan militari ka helaya kuwa Itoobiya iyo
Al-shabaab.
Dagaalka ayaa bilaawday kaddib markii Al-Shabaab ay dhowr jiho ka weerartay
saldhig ciidamada Itoobiya ku lahaayeen garoonka diyaaradaha Baardheere,
waxaana dagaalka uu qaatay saacado.
Goobjoogayaal ayaa warbaahinta gudaha u sheegay in dagaalamayaasha
Al-Shabaab ay dhowr jiho ka weerareen garoonka diyaaradaha, balse ciidamada
Itoobiya ayaa iska difaacay weerarka, waxaana labada dhinac isu adeegsadeen hub
culus.
Waxaa ay sheegeen in ay maqlayeen
madaafiicda iyo qoryaha noocyadooda kala duwan oo la isu adeegsanayay, inkastoo
garoonka diyaaradaha uu ku yaallo meel banaanka ka ah Baardheere, ma jirto
khasaare dadka rayidka ka soo gaaray dagaalkii xalay.
Al-Shabaab ayaa dhowr jeer oo hore weeraray garoonka diyaaradaha Baardheere,
iyadoo weerarada ay u badnaayeen kuwo ku dhufo oo ka dhaqaaq ahaa oo xilliyada
qaar ay madaafiic laga soo riday meelo fog fog ay adeegsanayeen.
C/raxmaan Diini,
Hiiraan Online
[email protected]