Sabti, Feberaayo, 17, 2018 (HOL) - Guddoomiyaha Gobolka Benaadir ahna duqa
Muqdisho Mudane Cabdiraxmaan Cumar Cusmaan Yarisoow ayaa wareejiyey dhul
ku yaalla degmada Wadajir ee deegaanka Jazeera oo ciidamada xoogga dalka
Soomaaliyeed ay dawladda Turkiga uga dhisi doonto xarun tababar oo casri ah.
Duqa Muqdisho ayaa tilmaamay in dhulkan ay lahaayeen intiisa badan ciidamada xoogga Dalka, isla markaana si-deg deg ah looga dhisi doono xarun
qalabkeedu u dhameystiran yahay oo lagu tababarayo ciidamada xoogga dalka
Soomaaliyeed.
“Dhulkan waxaan u bixinay dan guud in loo isticmaalo iyo sidii uu u noqon
lahaa xarun lagu tababaro ciidamada, waana qorshe wax tar u leh bilicda iyo
amniga gobolka iyo guud ahaan dalka.”
Sidoo kale, Guddoomiye Yarisoow waxa uu sheegay in dhulkan qeyb ka mid ah ay
lahaayeen dad shacab ah balse ay isku af-garteen wasaaradda gaashaandhigga dowladdaa
federaalka ah in dadkaas loogu badelo dhulal kale oo ay ku leeyihiin ciidamada
xoogga dalka gudaha magaalada Muqdisho.
“Waxaan ka wada hadlanay taliska ciidamada xoogga dalka iyo wasaaradda
Gaashaandhigga sidii loo maareyn lahaa qaar ka mid ah bogcadaha dhulkan oo ay
qaar lahaayeen dad shacab ah, Arrinkaas oo aan guddi baaritaan u saareyno cid
kasta oo dokuminti sax ah la timaadana waxa aan u qoondeynaynaa dhul kale oo la
qorsheyn doono”ayuu yiri Eng.Yariisow.
Wasiirka Wasaaradda Gaashaandhigga Maxamed Mursal iyo taliyaha ciidamada xoogga dalka
Jeneraal Cabdiweli Jaamac Xuseen (Gorod) ayaa bogaadiyey wada shaqeynta
wanaagsan ee ka dhaxeysa ciidamada iyo bulshada Gobolka, iyagoona sheegay in ay
kala shaqeynayaan maamulka gobolka sidii xal loogu heli lahaa dadka qeybta ku
lahaa dhulkan loo aqoonsaday danta guud.
Taliyaha Xarunta Tababarka Turkiga ee Soomaaliya Jeneraal Maxamed Yaasiin
ayaa tilmaamay xiriirka walaaltinimada leh ee ka dhaxeeya labada dal, waxa uuna
sheegay in ay kaalin muhiim ah siinayaan dib u dhiska Soomaaliya gaar ahaan
dhanka amniga iyo horumarinta kaabeyaasha dhaqaalaha.
C/raxmaan Diini, Hiiraan Online
[email protected]