Guddoomiyaha Maxkamada Sare : Dadka Al-shabaab Garsoorka u doonta waxey muteysan doonaan ciqaab
Sabti, December, 29, 2018
(HOL)- Guddoomiyaha Maxkamada Sare
Soomaaliya Baashi Yuusuf Axmed ayaa wax aan loo dul qaadan karin ku tilmaamay
in dadka shacabka ee ku dhaqan deegaannada ay dowladdu maamusho Garsoor u
doontaan Maxkamadaha Al-shabaab.
Gudoomiye Baashe ayaa ugu digay dadka u doonta Al-shabaab
Garsoorka in ay wajahi doonaan cawaaaqibkeeda oo uu sheegay in xabsi ay ku
muteysan doonaan, waxa uuna ku nuux nuuxsaday in maxkamada ay soo gola joojin
doonaan dadkii ay ku cadaato in Shabaab ay cadaalad ay u doonteyn.
Wuxuu kaloo sheegay in todobaadkii hore xabsiga loo taxaabay saddex ruux oo
Al-Shabaab garsoor u doontay deegaanada ay maamulaan, kuwaasoo horay ugu
guuldareystay Maxkamadaha dowladda Federaalka.
“Waxaa jira dad aan og-nahay oo maxkamaddaha ay
dacwado ka yaalaan, oo dacwadahaasi looga guuleystay oo Documentiyada ay sitaan
been ay yihiin, dabadeedna si ay cadaaladda u hor istaagaan u taga cadowga
dalka, markaa waxaan doonaynaa in aan Shacabka u sheegno in aanan u
dulqaadaneyn iyadoo Garsoor Cadaalad ah dalka laga heli karo in cadowga u
tagaan.” Ayuu yiri Gudoomiyaha Maxkamadda Sare ee dalka
Dadka Shacabka ee ku dhaqan deegaannada ay
maamusho dowladda Soomaaliya ayaa intooda badan xukun iyo garsoor u aadan
Maxkamadaha Al-shabaab, waxaana jira digniin marar badan oo hore ay dadkan u
jeediyeen mas’uuliyiinta deegaannada ay dowladdu ka arimiso, laakiin waxaa
muuqata in bulshadu wali ku xukuntamaan maxkamadaha ay maamulaan Al-shabaab.
C/raxmaan Diini, Hiiraan
Online
[email protected]