Jimco, December, 21,
2018 (HOL)- Ururka Al-shabaab ayaa ku baaqday dagaal aan horey loo arkay Kooxda
Daacish oo waayadii ugu danbeeyay ku sii xoogeysaneysay deegaanno ka tirsan
Soomaaliya.
Afhayeenka Al-Shabaab Sheekh Cali dheere ayaa
kooxda daacish ku tilmaantay "cudur halis ah iyo kaansar".
Bayaankani ka soo baxay hogaanka sare ee Xarakada
Al-Shabaab ayaa looga hadlay waxa shaababku ay ku tilmaameen dhibaatooyinka iyo
gabood fallada kooxda Daacish ee Soomaaliya.
Bayaankan oo uu akhriyey afhayeenka Al-Shabaab,
Sheekh Cali Maxamuud Raage (Sh Cali Dheere) isla markaana lagu baahiyay
shabakadaha u janjeera dhanka Shabaabku ayaa lagu sheegay "in kooxda
Daacish, gaar ahaanna garabka ka hawlgala Soomaaliya uu ka shaqeynayo sidii
tafaraaruq looga dhex abuuri lahaa gudaha Al-Shabaab."
Sheekh Cali Dheere ayaa daacish ku eedeeyay
"iney banneysatay dhiigga Muslimiinta, gaaleysiisayna dad muslimiin ah,
gaar ahaanna kooxdiisa iyo kala jebinta muslimiinta."
Wuxuuna intaasi ku daray "in Al-Shabaab ay
in muddo ah u dulqaadanaysay daacish, balse sida uu sheegay haatan dulqaadkaasi
ka sii qaadeen madax adeyg, colaad iyo in Daaicsh-ku ku sii talax-tagaan waxa uu
ugu yeeray dulmiga ay ku jireen."
Sheekh Cali Dheere ayaa sidoo kale kooxdaasi
Daacish ku eedeeyay "in ay gabaad u noqotay waxa uu ku tilmaamay
Jawaasiista maamullada riddada, taa oo u muuqata in uu ula jeedo dowlad
goboleedyada xubinta ka ah dowladda federaalka ee Soomaaliya."
Afhayeenka Al-Shabaab waxaa kale oo uu sheegay in
ay gacanta ku dhigeen dad uu ku sheegay "canaasir oo ka tirsan Daacishta
Soomaaliya oo sida uu sheegay maleegayey dilal qorsheysan oo lagu beegsanayo
xubno ka tirsan kooxdiisa Al-Shabaab."
Geba-gebada bayaankiisa ayuu afhayeenka Al-shabaa
Shekh Cali Dheere wuxuu ku dhawaaqay dagaal ka dhan ah kooxda Daacish wuxuuna
yiri:
"Hogaan-ka sare ee Xarakada Al-Shabaab wuxuu
ku amrayaa dhammaan ciidamada uruka iyo wilaayaatka Islaamiga inay si adag kaga
hortagaan waxaa uu ku tilmaamay cudurka dilaaga ah oo uu ula jeedo Daacish.
Cali Dheere waxaa uu sidoo kale ugu baaqay
dagaalamayaasha kooxdiisa in ay salka ka jaraan waxa uu ku tilmaamay kansarka
la doonayo buu yiri in lagu beero safka Mujaahidiinta.
Bayaan-ka Al-Shabaab ayaa ku soo beegmayo iyadoo dhawaan kooxda daacish ay
sheegtay in deegaanada Puntland ay ku laysay dhawr ka tirsan al-shabaab.
Kooxda Daacish ayaa isku dayeysa in ay Shabaabka
ku ciriiriso gudaha Soomaaliya waxa ayna ka hawl gashaa qaybo ka mid ah
Soomaaliya, sida magaalada Muqdisho.
Shabaab iyo Daacish ayaa marar hore ku dhex
dagaalamay gudaha Soomaaliya, waxaa dadka u dhuun daloola kooxaha mintidka ahi
ay dagaalladaasi ku tilmaameen tartan dhanka awoodda ah balse haatan waxaa
muuqanaya in dagaalkooga uu salka ku hayo mabaa'dii.
Bayaanka Al-shabaab iyo warkan ka sii horreeyay
ee Daacish ayaa ka dhigan in Soomaaliya uu haatan ka curtay dagaal kale oo u
dhaxeeya kooxahani islaamiyiinta ahi oo markii horeba isu baheysanayay dowladda
Soomaaliya.
C/raxmaan Diini, Hiiraan
Online
[email protected]
