Khamiis, August, 09, 2018 (HOL)- Odayaal
wax-garad iyo siyaasiyiin ka soo jeeda beesha Carab Soomali ayaa siweyn uga soo
horjeestay isku-shaandheyn uu dhawaan sameeyay ra’iisal wasaaraha xukuumadda
Soomaaliya.
Ra’iisal wasaare Kheyre ayaa isku-shaandheyntaas
xilkii Wasiirka ku-xigeenka Shaqada iyo Shaqaalaha uga qaaday Cabdicasiis Carmaan oo ka soo jeeda
beesha Carab Soomaali, iyaga oo taallaabadaas ku tilmaamid lagu dulmay guud
ahaanba xuquuuqdii ay beesha ku laheyd dowladda dhexe ee Soomaaliya.
Kulankan ay yeesheen siyaasiyinta iyo wax-garadka
beesha ayaa lagu faray madaxweynaha iyo ra’iisal wasaaraha Soomaaliya in ay arintan hoos u
eegaan, islamarkaana sida ugu dhaqsiyaha badan loo soo celiyo kursigii ay beeshu laheyd.
‘’Madaxweynaha Soomaaliya iyo ra’iisal wasaaraha
labadu-ba waxaa leenahay waa in si deg deg ah loo soo celiyaa kursigii aan ku
laheyn xukuumadda, ama waa in ay u cadeeyaan beesha in aysan wax xuquuq ah ku
laheyn dalka ‘’ ayuu yiri Ibraahim Saalax Deyful-laahi oo ah
xildhibaan hore.
Xildhibaan Maxamed Cabdulla Deeqoow Carab oo ka
tirsan mudanayaasha baarlamaanka Hirshabeelle ayaa arin nasiib darro ah ku
tilmaamay dowladdu xaqirto sida uu hadalka u dhigay masabka siyaasadeed ee
beesha.
”Waa wax laga xumaado ah in
beel dhan la xaqiro xubintii ay ku laheyd dowladda, hadda waxaan leenahay hal
xildhibaan oo kaliya, Farmaajo iyo Kheyre ha qaateen xildhibaan-kana
kursigiisa, madaxda dowladda
waxaa leenahay dadkan u keena diyaarado oo dalka ka saara haddii aysan wax
xuquuq ah ku laheyn ayuu yiri xldhibaan Deeqoow.
Dhinaca kale qaar ka mid ah
wax-garadka beesha ayaa sheegay in
kursigan la sii sadeeyay, kaddib markii wasiir ku-xigeenka cusub ee hadda la
magacaabay oo horay u ahaa wakiilka Jaamacada Carabta booskiisii lagu badallay
Prof Maxamed Cumar Dalxa oo ka mid ahaa xildhibaannadii sida weyn u taageeray
xiligii uu socday mooshinkii ka dhanka ahaa Prof Maxamed Cismaan Jawaari.
Kulankan ayaa imaanaya xili
beesha Carab Soomaali ay walaac badan ka muujisay habka iyo wadiiqada loo maray xil
ka qaadista Wasiir ku-xigeenkii Shaqada iyo Shaqaale oo hadda ah xubin ka
tirsan baarlamanka Soomaaliya.
C/raxmaan Diini, Hiiraan
Online
[email protected]