Wasaaradda arrimaha dibedda oo beenisay eedeyn loo jeediyay Wasiir ku-xigeenka Wasaaradda
Isniin, August, 06,
2018 (HOL) – Wasaaradda arrimaha dibedda Soomaaliya ayaa war ay soo saartay
wax-ba kama jiraan ku tilmaamtay eedeyntii hanti-dhowrka guud iyo xeer
ilaaliyaha Qaranka oo ka dhan ahaa Wasiir ku-xigeenka Wasaaradda Mukhtaar Mahad
Daa’uud.
Hoose ka akhriso
Qoraalka ka soo baxay Wasaaradda :
Wasaaradda Arrimaha Dibadda iyo Iskaashiga
Caalamiga waxa ay beeninaysaa dhammaan eedeymaha xaqiiqda ka fog ee lagu
asteeyay waxa loogu yeeray “Musuq maasuq” ee warbaahinta ay mariyeen
Hantidhowrka guud ee Qaranka iyo Xeer ilaaliyaha guud ee Qaranka, waxayna
caddeyn u tahay habka ay uga tallaabeen hannaanka hey’adaha dowladda ay ku wada
shaqeeyaan oo ah dukuminti is dhaafsi, taasi badalkeeeda ay ku dhiiradeen inay
meel uga dhacaan maamuuska iyo xurmadda Wasaaradda, sidoo kale ay sumcad dilaan
Mas’uul dowladeed oo xilkii loo igmaday gudanaya, lana hayn caddeymo sugan oo
ah sheegashadooda.
Ciidan boolis ah oo loo tababaray la dagaalan argagaxiso ayaa xoog ku jiiray
Dhismaha Wasaaradda August 04, taasina waxay Wasaaraddu u aragtaa fal lagu
burburinayay kalsoonida wada shaqeyn ee hore loo abuuray, laguna dhaawacayay
heybadeeda.
Wasaaraddu waxay cambaareyneysaa falkaasi
ciidanka ee sharci darada ah ee loogu xadgudbay sharafteeda iyo shirka jaraa’id
ee Hantidhowrka guud ee Qaranka iyo Xeer ilaaliyaha guud ee Qaranka ay ka
jeediyeen hadallo been abuur ah oo aan asaas lahayn oo meel ka dhac ku ah
sumcadda Wasiir kuxigeenka.
C/raxmaan Diini, Hiiraan
Online
[email protected]
