Maxey salka ku heysaa xiisada Jigjiga oo ay la wareegeen ciidamada federaalka Itoobiya
Sabti, August, 04, 2018 (HOL)- Warar
kala duwan ayaa ka soo baxaya sababta ka
danbeysa tallaabada ay qaadeen ciidamada
federaalka Itoobiya oo subaxnimadii hore ee saakay si buuxda ula wareegay guud
ahaanba xarumihii Ismaamulka Soomaalida Itoobiya ee Jigjiga.
Wargeys ka soo baxay Addis Ababa
oo lagu magacaabo Standard ayaa qoray in uu jiray khilaaf xoog leh oo soo kala
dhaxgalay maamulka madaxweyne Cabdi Maxamuud Cumar ee dowlad deegaanka
Soomaalida iyo madaxda xukuumadda dhexe ee federaalka Itoobiya.
Wararka ayaa intaa ku daraya in
ka hor inta aysan ciidamada gudaha u galin magaalada Jigjiga uu jiray qaban-qaabada kulan aan caadi aheyn oo uu yeelan lahaa baarlamaanka Itoobiya.
Xildhibaannada dowlad deegaanka
Soomaalida Itoobiya qaarkood oo si toos ah warbaahinta ula hadlay ayaa sheegay in ay soo
weerareen ciidamo Oromo ah oo sida ay hadalka u dhigeen uu soo diray ra’iisal
wasaaraha Itoobiya Abiy Ahmed, waxaana ay bulshada ugu baaqeen in ay is difaacaan.
Qaar ka mid ah siyaasiyiinta ka
soo jeeda gobolka iyo kuwa u dhaqdhaqaaqa ayaaha dhulka Soomaalida Ethiopia oo
Baraha bulshada ka soo muuqday ayaa talaabada ciidamadda ay kula wareegeen
Jigjiga ku tilmaamay “Afgambi”
Magaalada waxaa ka jirta xaalad
kacsanaan ah oo dadka ayaa dariiqyada isugu soo baxay iyada oo ku dhawaaqaya
erayo ka dhan ah dowladda dhexe ee Itoobiya, waxaana la arkayay dadka qaar oo
dab qabadsiinaya calanka Itoobiya.
Tan iyo wixii ka danbeeyay
isbadalkii ka hana-qaaday Itoobiya dad badan waxaa ay saadaalinayeen in
isbadalka uu saameyn ku yeelan doono ismaamulka Soomaalida Itoobiya, oo siyaasad ahaan siweyn ugu dhawaa xisbigii hore ee tallada dalka lagala wareegay.
C/raxmaan
Diini, Hiiraan Online
[email protected]
