Taliyaha cusub ee ciidanka Liyuu Booliiska
Arbaco, August, 29, 2018 (HOL) – Tan iyo markii ay dhaceen
rabshadihii siyaasadeed ee keenay in ay dhacdo xukuumadii hore ee dowlad
deegaan-ka, waxaa si is daba joog ah u soo baxayay warar sheegayay in dowladda
dhexe ee federaalka Itoobiya dabacsan tahay in la kala diro gabi ahaan-ba ciidamada
Liyuu Booliiska ee ka howlgala dowlad deegaanka Soomaalida.
Laakiin hadda waxaa meesha ka
baxay shakigii arintaan ku saabsanaa kaddib markii madaxweynaha cusub ee dowlad
deegaanka Soomaaliya Mustafe Cagjar uu taliye cusub u u magacaabay ciidamada oo
uu aas-aasay madaxweynihii hore ee dowlad deegaanka Cabdi Maxamuud Cumar.
Maxamed Cabdi Mawsar ayaa
noqonaya taliyaha guud ee ciidamada Liyuu Booliiska, waxaana la sheegay shir
deg deg ah oo yeesheen madaxweynaha iyo
taliyaha cusub waxaa ay ka wada hadleen amniga gobolka iyo sidii ay ciidamadu u
noqon lahaayeen kuwo ka madax-bannaan siyaasada.
‘’Ciidamada Liyuu Booliisku ma’aha
ciidamo shisheeye, sidaa daraadeed isbadalka maamulka ku dhacay iyaga ma
saameynayo’’ ayuu yiri ku-simaha madaxweynaha dowlad deegaanka, islamarkaana
madaxweyne ku-xigeen.
Waxaa jiray muddo dheeer-ba
eedeymo culus oo loo jeedinayay ciidamada oo la sheegay in ay laftirkooda qeyb
ka ahaayeen xadgudubyo ka dhacay deegaanka oo isugu jiray dilal bareer ah, jir
dil, iyo waliba dhaca hantid dadweyne, hasse ahaatee saraakiisha Liyuu
Booliiska ayaa inta badan ku doodayay in dadka arrimahaa ku kacaya yihiin kuwo
sheeganaya magaca ciidamada oo aan wax shaqo ah ku laheyn.
Maamulka cusub ayaa u muuqda mid
hadda fiiri-gaar ah u leh dhaqdhaqaaqyo ay deegaanka ka sameeyaan dad
taageersan madaxweynihii hore Cabdi Maxamuud Cumar oo hadda xabsi ku jira.
C/raxmaan Diini, Hiiraan
Online
[email protected]
