Madaxweyne Biixi oo isbarbar dhig ku sameeyey Muqdisho iyo Addis siday u waajaheen Hargeysa iyo Asmara
Talaado, August, 28, 2018 (HOL)– In
ka badan sagaal boqol oo arday ayaa maanta ka qalinjabisay jaamacadda Hargeysa,
kuwaas oo ka soo baxay kuuliyaddo kala duwan.
Munaasibad loogu qabtay xarunta jaamacada
Hargeysa waxa ka soo qaybgallay madaxweyne Muuse Biixi, golihiisa wasiiradda,
xisbiyada mucaaradka, maamulka iyo macalimiinta jaamacadda, waalidiin iyo
ardaydii qalinjabinaysay.
Gudoomiyaha Jaamacada Hargeysa, Maxamed
Yuusuf ayaa sheegay inay ardaydaasi qalinbaisay ka kooban yihiin 937 arday oo
507 wiilal yihiin, halka 430 gabdho yihiin.
Waxa iyaguna halkaasi ka hadlay gudoomiyaha
maxkamadda sare ee Somaliland, wasiirka waxbarashadda, masuuliyiin ka socda
shirkadaha gaarka loo leeyahay iyo masuuliyiin kale, kuwaas oo dhamaantood u
hambalyey ardaydan ka qalinjabisay jaamacadda oo noqonaysa dufcaddii 15aad ee
jaamacada dhamaysata.
Madaxweynuhu inta aanu hoolka soo galin waxa uu
dhagax dhigay dhismaha shaybaadh casriya (laboratory) oo ay yeelan doonto
Jaamacadu kaasoo madaxweynuhu u ballan qaaday jaamacada mar uu kormeer ku tegay
22 May, 2018, sidoo kalena waxa uu xadhiga ka jaray hool weyn oo jaamacadu
yeelanayso kana caawin doona shirarka iyo kulamada muhiimka ah.
Madaxweynuhu wuxuu hambalyo u diray ardayda
qalinjabinaysa waxaanu ugu bushaareeyey inuu sameeyey sanduuqa horumarinta oo
uu ku shubay hal milyan oo doolar, taas oo dhalinyaradaha jaamacaha ka soo
baxay shaqo qaran oo lagu tobabaro doono lagu bixin doonno.
Waxa kale oo uu sheegay in sanad walba kun wiil
iyo shan boqol oo hablood shaqo qaran loo qaadan doonno, taas oo la barayo
habka loo shaqeeyo, ka dibna xafiisyada dawlada laga hawlgalin doono.
madaxweynuhu waxa uu shahaadooyin gudoonsiiyey Ardaydii ugu saraysay dufcadaha
kala duwan ee Jaamacada Hargeysa iyo xubin sharaf ay Jaamacada Hargeysa ku
qiimaysay dedaal waddannimo oo uu muujiyey askari ka tirsan ciidanka
nabadgelyada waddooyinka oo ay maamulka Jaamacadu u aqoonsadeen muwaadin daacad
u ah qarankiisa, ka dibna madaxweynuhu dadka hortooda ka shaaciyey inuu isna
dalacsiiyey hal derejo askarigaasi oo markii hore ahaa saddex xadhigle.
Dhinaca kale, waxa uu hamablyeeyey madaxweynaha
iyo ku xigeenka cusub ee loo doortay deegaanka Soomaalida Itoobiya oo uu
sheegay in labadda shacab isku mid yihiin oo ganacsiga iyo is dhexgalka
bulshadaba soo dhoweynayo oo nin waliba magaalada uu doonno ka ganacsan
karo.
Waxa kale oo uu isbarbar dhig ku sameeyey
siyaasadaha Muqdisho iyo Adis-ababa ku wajaheen Eritariya iyo Somaliland,
waxaanu yidhi “ Addis-ababa waxay 1993kii ogolaatay Madax banaanida Eritariya
oo ay taageertay, Muqdishana waxay ka dagaalantay madax banaanida Somaliland,
sanadkan 2018ka addis-ababa waxay qaatay talaabo ah colaadii dhexmartay Eritariya
iyo Itoobiya si loo dhameeyo ayuu Ra’isal wasaaraha Itoobiya uu lugihiisa ku
tago Asmara, oo uu u ogolaaday wax kasta oo ay rabeen oo uu ka dalbatay uun is
kaashanno iyo in walaalo la noqdo, Muqdisho dadka ka taliya 2018 ka waxay
qaateen talaabo ah Somaliland cirka ka xidhaynaa oo cidi soo gali kari mayso,
Somaliland badda ka xidhayna oo Berbera cidi iman mayso, ka dibna uu yidhaahdo
bariga ka soo weerarayaa oo uu ku dhaarto inuu ku soo weerarayo waa laba caqli
oo is barbar yaala waa ka Muqdisho iyo Addis kala yaalla.”
Waxa uu sheegay in muqadas tahay in la kala
tashado hadii la heshiin waayo.
Barkhad-ladiif M. Cumar, Hiiraan Online
[email protected]
Hargeysa, Somaliland