Qeybo ka mid ah deegaannada Galmudug oo maanta ay u tahay maalintii koowaad ee Ciidul-Axda
Arbaco, August, 22, 2018 (HOL) – Wararka naga soo gaaray
degmooyinka Dhuusa-Mareeb iyo Guri-Ceel ayaa sheegaya in maanta ay u tahay
maalintii koowaad ee Ciidul-Axda oo siweyn looga dabaal-degay guud ahaanba
dunida muslim-ka maalintii shalay.
Wariye ku sugan degmada
Dhuusa-Mareeb ee gobolka Galguduud oo la hadlay Hiiraan Online laakiin
magaciisa codsaday in aan la shaacin ayaa sheegay in qeybo badan oo ka mid ah
deegaannada uu ka arimiyo maamulka Galmudug aan laga ciidin maalintii shalay,
hasse ahaatee maanta oo Arbaco ah leysugu soo baxay Masaajidda waaweyn si loogu
Ooga Salaada Ciidda.
Wariyaha ayaa intaa ku daray in
ay jiraan qaar ka mid ah dadka ku dhaqan deegaannada Galmudug oo hoos ula
ciiday maalintii shalay qeybaha kale ee dalka, iyaga oo dhinaca kalana ka cabsi
qaba maamulka ka jira deegaan-ka oo shalay ay u aheyd maalinta Sagaalaad bisha
Carrafo.
Masaajidada ku yaalla magaalada Dhuusamareeb ayaa
saakay laga maq-layay Takbiirta, iyadoo lagu dukaday salaada Ciida, waxaana
dadka tukashada Salaada kala qeyb-galay mas’uuliyiin uu ka mid yahay madaxa
xukuumadda Galmudug Sheekh Maxamed Shaakir Cali Xassan.
Deegaannada gobollada dhexe gaar ahaa gobolka
Galguduud ma’aha wax cusub in ay ku qilaafaan dalka intiisa kale munaasabadaha
waa-weyn ee Ciidda, iyaga cus-kanaya kaliya in lagu go’aan qaadan karo aragtida
bisha.
C/raxmaan
Diini, Hiiraan Online
[email protected]