Arbaco, August, 15, 2018 (HOL)- Sheikh Tamim Bin Hamad al-Thani Amiirka
dalka Qatar ayaa sheegay in ay bar bar taagan yihiin sida uu hadalka u dhigay
walaalahooda Turkiga, isaga oo ku dhawaaqay maalgashi dhan $ 15bn oo ay ku
sameynayaan Suuqyada iyo Bankiyada dalka Turkiga.
Amiirka ayaa arintan uga dhawaaqay kulan magaalada Ankara uu kula yeeshay madaxweynaha dalka Turkiga Rajab
Dayib Erdogan.
Turkiga ayaa hadda wajahaya go’doomin dhaqaale
kaddib xiisad adag oo soo kala dhax-gashay iyaga iyo dowladda Mareykanka.
Amiirka Qatar ayaa noqonaya mas’uulkii ugu
horeeyay ee booqday caasimada dalka Turkiga ee Ankara tan iyo markii uu soo
ifbaxay qalalaasaha dhaqaale ee u dhaxeeya dowladdaha Mareykanka iyo Turkiga.
Sidoo kale labada mas’uul ayaa ka wada hadlay
sidii loo sii xoojin lahaa xiriirka ka dhaxeeya labada dowladood Qatar iyo
Turkiga.
Amiir Sheikh Tamim ayaa noqonaya mas’uulkii ugu
horeeyay ee ku dhawaaqa in dalkiisu barbar taagan yahay Turkiga oo hadda
wajahaya dagaal dhinaca ganacsiga ah oo uga imanaya xukuumadda Washington.
C/raxmaan
Diini, Hiiraan Online
[email protected]