11/14/2018
Today from Hiiraan Online:  _
Wararka Maanta- Arbaco, Aug 1 , 2018
Puntland: Ra'iisul wasaare Khayre oo lugu dhaleeceeyay inuusan ka qeybgalin dhagax-dhiga dekedda Garacad


 

Arbaco, August, 01, 2018 (HOL)– Ra'iisul wasaaraha Soomaaliya, Xasan Cali Khayre oo booqasho ku jooga Puntland ayaa dhaleeceyn kala kulmey qaar ka mid ah isimada iyo siyaasiyiinta Puntland oo ku dhaliilay ra'iisul wasaaraha in uusan ka qeybgalin munaaasabadda lugu casuumay ee shalay lugu dhagax-dhigay dekedda Garacad iyo waddo laami oo isku xireysa deegaanka iyo degmada Galdogob.

Islaan Bashiir Islaan Cabdulle oo ka mid ah isimada Puntland ee labada mashruuc dhagax-dhigay ayaa ka sheegay munaasabadda dhagax-dhiga,inay aad uga xumaadeen ra'iisul wasaaraha oo jooga Puntland inuusan munaasabadda ka qeybgalin, wuxuuna caddeeyay dowladda Federaalka inaysan heli doonin sabab lugu qanco oo arrinta lugu gudi doono.

"Madaxda aan halkan ku casuunay waxaan u heysannay madax qaran oo umadda Soomaaliyeed oo dhan u dhaxeysa siddan moodeyney ma noqon .. laakin waanan isku haleyn doonin."ayuu yiri Islaan Bashiir .

War-saxaafadeed goor dhow ka soo baxay siyaasiyiin ku bahoobay urur ay u bixiyeen Puntland Focus Group ayaa dhankooda sheegay in ay aad iyo aad uga xunyahay in ra'iisul wasaare, Khayre oo booqasho rasmi ah ku jooga Puntland uu diido ka qayb-galka iyo dhagax-dhigga mashruuca dekedda Garacad oo ah dadaal reer Puntland si iskutashi ah u wadeen muddo dheer.

" Puntland haddii ay wanaag waddo oo xumaan lagu sameeyo ma in iyaduma xumaan samaysa, waa maya. Wanaagii baan waddi doonaa.” ayuu yiri madaxweynaha Puntland, Cabdiweli Gaas oo hadalkan ka jeediyay munaasabaddii lugu dhagax-dhigay mashaariicda.

Iman Mohamed Jama, Hiiraan Online

[email protected]

 







Click here
8/1/2018 3:08 PM EST
Arbaco, August , 01, 2018 (HOL)–Golaha Wasiiradda xukuumadda Soomaaliya oo galinkii danbe ee maanta hal diyaarad ka raacay magaalada Muqdisho ayaa caawa ku hooyanaya magaalada Garoowe ee xarunta maamul gobolleedka Puntland.

8/1/2018 1:25 PM EST
Arbaco, August , 01, 2018 (HOL)-Qaraxan oo dhacay fiidkii hore ee caawa ayaa waxaa la sheegayaa in qof walxaha qarxa ku xirnaayeen uu beegsaday gaari ay saaraayeen mas’uuliyiin ka tirsanaa maamulka Khaatumo garabka loogu yeero Badbaado Khaatumo.

8/1/2018 10:06 AM EST
Arbaco, August, 01, 2018 (HOL)-Shirkii nabadeedkii ka socday Ceel Afweyn ee lagu soo afjarayey shaqaaqo ka dhextaagnayd laba beelood oo walaalo ah oo deegaanka wada daga ayaa maanta go’aamo shareecada ku qotoma laga soo saaray.

8/1/2018 8:47 AM EST
Arbaco, August, 01, 2018 (HOL) War qoraal ah oo ka soo baxay safaarada Jabuuti ee Soomaaliya ayaa lagu sheegay in dowladda Jabuuti siweyn uga naxday hadal uu dhawaan madaxweynaha dowladda Soomaaliya Maxamed Cabdullaahi Farmaajo uu ka sheegay magaalada Asmara oo ahaa in cunaqabateynta laga qaado dalka Eritrea.

8/1/2018 3:14 AM EST
Arbaco, August, 01, 2018 (HOL)–Wasiirka wasaaradda arrimaha dibeda dalka Jabuuti Maxamuud Cali Yuusuf oo Qoraal kooban soo dhigay boggiisa Twitter-ka ayaa wax-ba kama jiraan ku tilmaamay warar soo baxayay oo sheegaya in madaxweynaha Jabuuti booqanayo dhawaan dalka Eritrea.

8/1/2018 1:22 AM EST
Arbaco, August, 01, 2018 (HOL)–Howlgal qorsheysnaa oo ciidamo ka tirsan dowladda Soomaaliya ka sameeyeen degmada Afgooye ee gobolka Shabeellaha hoose waxaa ay sheegeen in ay ku qabteen 11 dagaalyahanno ka tirsan xoogagga Al-shabaab.

8/1/2018 1:04 AM EST
Arbaco, August, 01, 2018 (HOL)–Dhibaato dhaqaale, shaqaale yari iyo waliba daruufo kale oo la soo darsay ayaa laga yaabaa ugu danbeyntii ay meesha saarto Adeega AAMIN AMBULACE ah adeeg siweyn 12kii sano ee la soo dhaafay u mahadiyeen shacabka reer Muqdisho oo ay daashadeen dagaallo iyo colaado sokeeye.

8/1/2018 12:35 AM EST
Arbaco, August, 01, 2018 (HOL)–Guddoomiyaha ganacsatada dowlad gobolleedka Jubbaland, islamarkaana ah xoghayaha rugta ganacsiga Soomaaliyeed Shaafi Raabi oo dib ugu laabtay magaalada Kismaayo ayaa sharaxaad kooban ka bixiyay wax-yaabihii ka qabsaday garoonka Aadan Cadde ee magaalada Muqdisho.