Xildhibaannada Baarlamaanka oo lagu war-galiyay kulan maalinta Berri ah ka dhacaya xarunta Golaha Shacabka
Axad, April, 08, 2018 (HOL) - Warar saacadihii ugu danbeeyay soo baxay ayaa
sheegaya in guddoomiye ku-xigeenka koowaad ee Golaha Shacabka Cabdiwali Muudeey
u diray xildhibaannada taageersan mooshinka isaga oo ku war-galiyay in ay ka
soo qeybgalaan kulan maalinta Berri ah ka dhacaya xarunta Golaha Shacabka.
Guddoomiye Muudeey ayaa ajandaha kulanka maalinta
Berri ah ku sheegay in uu noqonayo ka dooddista mooshinka ka dhanka ah
guddoomiyaha Baarlamaanka.
Fariimahan ayaa imanaya xili dhinaca kale uu
soconayo dadaal la doonayo in lagu soo afjaro khilaafka ka dhashay
mooshinka, hasse ahaatee waxaa muuqanaya
in wali ay jirto kala aragti-duwanaan iyo farqi u dhaxeeya dhinacyada iska soo
horjeeda.
Ilo xog ogaal ah oo ay Hiiraan Online xiriir la
sameysay ayaa u sheegay in kulanka lagu dhawaaqay noqon karo wiiqaya dadaallada socda ee uu madaxweynuhu hormuudka u yahay.
Xaalada ayaa sacadihii ugu danbeeyay u muuqatay
mid degan oo dhinacyadu isku soo dhawaanayaan, kaddib markii uu madaxweyne
Maxamed Cabdullaahi Farmaajo bilaabay in uu kulamo kala duwan la qaato guddiyo
ka kala socday labada dhinac.
Laakiin dad badan ayaa u arkaya kulankan uu ku
baaqay maalinta Berri guddoomiye ku-xigeenka koowaad mid sii xumeynaya xiisadii
markii horeba jirtay.
Waxaa dib uu dhacay kulan lagu
ballansanaa maalintii shalay in xarunta Golaha Shacabka ay ku yeeshaan
xildhibaannada mooshinka ka keenay guddoomiye Jawaari kaddib markii waabarigii
hore ee subaxnimadii Sabtidii shalay lagu wargaliyay xildhibaannada in kulankaa
uu dib u dhacay.
Lama oga in Berri uu qabsoomi doono kulanka uu ku
baaqay guddoomiye ku-xigeenka Golaha Shacabka iyo in kale, iyadoo la ogyahay in
marar badan oo hore dib loo dhigay fadhiyo qorsheysnaa in laga yeesho
mooshinka.
C/raxmaan Diini, Hiiraan Online
[email protected]
