Khamiis, April, 05, 2018 (HOL) - Baarlamaanka Uganda ayaa u yeereen Wasiirka
Gaashaandhigga dalkaasi, si wax looga weydiiyo weerarkii ururka Al-shabaab
1-dii bishan ay ku qaadeen fariisin ciidamada AMISOM gaar ahaan kuwa Uganda ay
ku leeyihiin degaanka Buula Mareer oo ka tirsan gobolka Shabeellaha hoose.
Guddoomiye kuxigeenka Baarlamanka Uganda Jocup Olenya oo warbaahinta la
hadlay ayaa waxa uu sheegay in ay u yeereen Wasiirka difaaca, oo Mudanayaasha
ay wax ka weydiinayaan weerarkii Buula-Mareer, si loo helo khasaaraha dhabta ah
ee ka dhashay weerarkaasi iyo magacyada Askartii ku geeryootay.
Dowladda Uganda ayaanan weli shaacin khasaaraha dhabta ah ee ciidamadooda ka
soo gaaray weerarkii Buula Mareer, maadaama shacabka ay u baahan yihiin in ay
ogaadaan tirada saxda ah ee weeraraasi ku geeryootay.
“Dadka waxay u baahan yihiin in ay ogaadaan weerarkaasi khasaarihiisa,
Xukuumadda weli kama aanay hadlin, sidaasi darteed waxaan u yeernay Wasiirka
Gaashaandhigga, si arrintan wax looga weydiiyo” ayuu yiri Guddoomiye Jocup
Olenya.
Saraakiisha ciidamada Uganda oo weerarkaasi ka hadlay ayaa ku faanay inay
qabsadeen gaadiid dagaal oo ay wateen ciidamada Shabaab, sidoo kalena intii uu
socday dagaalka ay ku qabsadeen hub Shabaab ay lahaayeen.
Al-shabaab ayaa waxaa ay sheegeen
weerarkii Buula-Mareer in ay ku dileen 59 Askari oo AMISOM ahaa, balse Dowladda
Uganda oo dagaalkan uu qabsaday ciidamada ayaa waxa ay beenisay warkan,
waxayna tilmaamtay in ay dishay 22 Al-shabaab ah.
C/raxmaan Diini,
Hiiraan Online
[email protected]
