Isniin, April, 30, 2018 (HOL) – Waxaa lagu wadaa
maanta oo Isniin ah in magaalada Muqdisho lagu qabto doorashada guddoomiyaha
Baarlamaanka Golaha Shacabka oo ay u tartamayaan ilaa 11 Musharax.
Musharaxaiinta u taagan qabashada xilka
guddoomiyaha Golaha Shacabka ayaa kala ah Ibraahim Isaaq Yarow, C/casiis Xasan
Maxamed (Lafta Gareen), Cali Sheekh Maxamed (Xaaji Cali), Saalim Caliyow Ibroow,
Sheekh Aadan Maxamed Nuur (Sheekh Aadan Madoobe), Idiris Cabdi Dhaqtar,
Xildhibaan Shariif Sheekhunaa Maye, Xildhibaan Maxamed Sh. C/raxmaan Mursal,
Xildhibaan Shariif Maxamed Cabdalla, Xildhibaan Maxamud Macalin Yaxye iyo
Xildhibaan Iimaan C/laahi Nuur.
Gudoomiyaha Guddiga doorashada Xildhibaan Nuur
Iidow Bayle ayaa warbaahinta u sheegay in maanta ay dhaceyso doorashada, ayna
rajeynayaan in si wanaagsan ay ku qabsoonto.
Hotelada qaar ee Magaalada Muqdisho xalay waxaa ka dhacay kulamo gaar gaar
ah oo lagu kala jiidanayo xildhibaanada Baarlamaanka, maadaama doorashada
keliya ay ka harsan tahay saacado qura.
Waxaa ay jira eedeymo loo jeedinayo xukuumadda Soomaaliya oo la xiriira in
ay wadato ama gadaal ka riixeyso musharax gaar ah, balse waxaa laga dhawr
sugayaa sida ay maanta wax u dhacaan.
Ciidamada Booliska Soomaaliya oo caawimaad ka helaya kuwa AMISOM ayaa aad u
adkeeyay ammaanka wadooyinka hormara xarunta Golaha Shacabka oo Doorashada ay
ka dhaceyso.
C/raxmaan Diini,
Hiiraan Online
[email protected]