Arbaco, April, 04, 2018(HOL) -
Khilaafka Guddoonka iyo Xildhibaannada Golaha Shacabka oo u muuqday mid sii
shiiqaya wixii ka danbeeyay Sabtidii aynu soo dhaafnay kaddib markii madaxweynaha dowladda Soomaaliya
Maxamed Cabdullaahi Farmaajo uu dib u dhigay kulan ay yeelan lahaayeen xildhibaannada
iska soo horjeeda, ayaa mar kaliya saacadihii ugu danbeeyay ee maanta cirka
isku shareeray.
Guddoomiyaha Golaha Shacabka Prof
Maxamed Cismaan Jawaari oo shir jaraa’id xafiiskiisa ku qabtay ayaa eedeymo
culus u jeediyay madaxweynaha dowladda Soomaaliya oo sida uu hadalka u dhigay
la saftay garab ka mid ah dhinacyada ee Baarlamaanka ee is haya.
Eedeynta guddoomiyaha Golaha
Shacabka ah mid culus marka dhinac laga eego ayaa u muuqata mid meesha ka
saartay waan-waan kasta oo ay suurtagal aheyn in arintan lagu dhameeyo.
Maalinta Berri ah oo ay taariikhdu
ku beegan tahay 04 bisha April 2018 ayeey mar kale xildhibaannadu u balansan
yihiin kulan aan wax badan ka duwaneyn kii Sabtidii aynu soo dhaafnay uu
madaxweynuhu is hor taagay, waxaana la filayaa haddii uu kulankani qabsoomo in
halkaa ay isugu tagaan Labo Garab oo kala wata Labo Ajande oo aad u kala fog.
Xildhibaannada taageersan
mooshinka ka dhanka ah Golaha Shacabka ayaa sheegay in ay fariin ka heleen
guddoomiye ku-xigeenka koowaad ee Golaha Shacabka Cabdiwali Muudeey oo sida ay
hadalka u dhigeen ku warga-liyay in Ajandaha kaliya ee maalinta Berri ah uu
noqon doono mooshinka ka yaala Baarlamaanka Guddoomiye Jawaari.
Dhinaca kale marka la eego
xildhibaannada ka soo horjeeda mooshinka ayaa iyaguna sheegay in ay heleen
fariin lagu wargalinayo in kulanka maalinta Berri ah looga dooddi doono xaalada
degmada Beled-Xaawo.
Is gaashaanbuursiga Xildhibaannada
dhaxdooda ah ayeey dad badan shaki ka
muujinayaan suurgalnimada in kulanka maalinta Berri ah uu noqon karo mid si degan u dhaca, madaama
dhinac walba uu ku adkeysanayo in sharci ahaan ay tahay in uu Goluhu uu ka dooddo
Ajandaha mid walba oo ka mid ah Labada Garab uu halkaa u xaadiray.
Lama oga sida ay wax isku badali
doonaan saacadaha soo socda iyo in mar
kale kulankan dib loo dhigi doono iyo in kale.
C/raxmaan Diini,
Hiiraan Online
[email protected]