Ciidamada AMISOM oo gurmad u sameynaya dadka ay fatahaadu saameysay ee Beledweyne
Jimco, April, 27, 2018 (HOL)
- Fatahaadan oo noqoneysa tii ugu
cusleyd ee sanadihii ugu danbeeyay soo marta magaalada Beledweyne ayaa saameyn
adag oo dhinaca nolasha ah ku yeelatay Kumannaan Kun oo Qoysas Soomaaliyeed ah,
kuwaa oo qaarkoodna u mar kacay deegaannada baxsan magaalada halka kuwo kalana
wali biyaha ku dhax go’doonsan yihiin.
Ciidamada Jabuuti ee qeybta ka ah
howlgalka midowga Africa AMISOM oo kaashanaya kuwa xoogga dalka Soomaaliyeed
ayaa bilaabey in ay u gurmadaan Qoysaska ku dhax go’doonsan daadadka ku rogmaday xaafaddihii ay ku
noolaayeen, kuwaa awoodi waayay in ay la baxaan carruurtooda iyo agab wixii ay u
baahnaayeen.
Maanta ayaa la arkayay gadiidka
ciidamada oo ay saaran yihiin kuwa howlgalka midowga Africa AMISOM oo dadka ka
soo saaraya xaafaddaha ay biyuhu harqiyeen iyaga oo geynaya dhulka taaga ah oo ay dadku u barakaceen.
Ciidamadan iskaashanaya ayeey u
suurtagashay in ay ka soo saaraan biyaha Boqolaal Qoysas ah oo markii hore
dhibaato weyn ku qabay sidii ay uga baxsan lahaayeen qulqulka daadadka oo u
muuqda kuwo mar walba sare u sii kacaya.
Madaxweynaha maamulka
Hirshabeelle Maxamed Cabdi Waare oo shir jaraa’id maanta ku qabtay magaalada
Beledweyne ayaa uga mahad celiyay ciidamada AMISOM kuwa dowladda Soomaaliya
gurmadka ay u fidinayaan dadka ay
saameysan fatahaada Wabiga Shabeelle.
C/raxmaan Diini,
Hiiraan Online
[email protected]
