Jimco, April, 27, 2018 (HOL)– Madaxweynaha
dowlad gobolleedka Hirshabeele Maxamed Cabdi Waare ayaa sheegay in ku dhawaad
26 Kun oo Qoys ku barakaceen daadadkii ugu danbeeyay ee ka dhuftay magaalada
Beledweyne.
Madaxweyne Waare ayaa sheegay in
biyaha Wabiga Shabeele dhaafeen xadiggii caadiga ah ee uu ku fatahi jiray,
taasoo macnaheedu noqonayo in biyaha hadda ku socda magaalada yihiin kuwo ka
soo burqanaya Wabiga oo Karkaarada jabsaday.
‘’Waad arkeysaan dhulkii caadiga
ahaa ee Wabigii lama kala garanayo dhibaato xoog leh ayeey bulshadu wajahayaan,
in ka badan 100 Kun oo ruux ama 26 Kun oo Qoys dad lagu qiyaasay ayaa magaalada
isaga baxay, dadkaa badankood waxaa ay wataan carruur, waayeel iyo dad
xannuusanaya ayuu yiri ‘’ Madaxwyne Waare.
Korontada ayaa gabi ahaan ka
maqan sidoo kalana waxaa adag oo inta badan aan shaqeyn habka Mobel-ka lacagaha
leysugu gudbiyo ee EVC Plus-ka, taasoo
sii adkeysay nolasha ka jirta guud ahaanba marka la eego magaalada Beledweyne.
“’Magaalo Koronto aan
laheyn, Aaladii EVC-ka aysan
shaqeyneynin, sidoo kalana aan laga isticmaali karin lacag shil Soomaali ah,
biyana ku socdaan waad garan kartaa dhibaatada ka jirta in ay la eg tahay ayuu
yiri ‘’ Madaxweyne Waare.
Baahida ugu weyn oo ay qabaan
bulshada ku barakacday fatahaada ayuu sheegay in ay hellaan Biyo nadiif ah,
Musqulo, dhinaca kalana gurmad loo fidiyo dadka ku dhax go’doonsan xaafaddaha
ay biyuhu ku fataheen.
‘’Ciidamada Itoobiya iyo kuwa
Jabuuti aad ayaan ugu mahad celineynaa gurmadka ay ka geysanayaan samatabixinta
dadka biyaha ku dhax go’doonsan ayuu hadalkiisa raaciyay madaxweynaha
Hirshabeelle oo maalmihii ugu danbeeyayba ku sugnaa magaalada Beledweyne.
C/raxmaan Diini, Hiiraan Online
[email protected]
