Jimco, April, 27, 2018 (HOL)–Waxaa sii kordhay saacadihii ugu danbeeyay biyaha ku
Fatahaya magaalada Beledweyne ee xarunta gobolka Hiiraan kaddib markii ay is
biirsadeen Roobab Lixaad leh oo da’aya iyo Wabiga Shabeelle oo Karkaarada
jabsaday.
Qeybo ka mid ah xaafaddaha magaalada ayaa ayeey
biyuhu qariyeen halka dhinaca kalena ku shubayaan xaafado markii hore
biyuhu aysan gaari jirin.
Marka la barbar dhigo Fatahaadii ugu danbeysay ee
sanadkii aynu soo dhaafnay ku dhufatay magaalada ayeey dadka waaya joogi ah kuu
sheegayaan in ay ka miisaan iyo xajmo culus tahay tan hadda magaalada looga
kala baxay madaama lagu guda-jiro xiligii Gu’ga oo da’mada roobabku laga yaabo
in ay waqti kale sii qaadato.
Qiyaastii 70% Qoysaskii degenaa magaalada ayaa u kala socdaal Tuullooyinka iyo deegaanka
Ceeljeelle oo ah dhul taag ah oo inta badan dadku deegaansadaan marka ay jirto
sidan oo kale Fatahaad uu sameeyo Wabiga Shabeelle.
Roobabka sii da’aya iyo warar soo baxaya oo
sheegaya in ay jiraan biyo kale oo ka soo rogmaya Togagga iyo Waadayaasha soo
gala Wabiga ayaa laga yabaa in ay xaalada uga sii daraan, waxaana hadda rajo
xumo weyn muujinaya Qoysas markii hore naawilayay in ay ku sii nagaan karaan
guryahooda.
Ilaa iyo hadda ma jiro gurmad la taaban karo oo
ay heleen dadka ka barakacay Fatahaada iyo kuwa wali ku dhax go’doonsan
xaafaddaha ay Biyuhu ku dhufteen marka laga soo tago fariimo lagu dalbanayo
gurmad iyo gargaar bani’aadannimo oo dirayaan mas’uuliyiinta Hirshabeelle iyo
maamulka gobolka Hiiraan.
C/raxmaan Diini,
Hiiraan Online
[email protected]