Liverpool oo 5-2 ku garaacday Roma cayaar xiiso badan oo leysku arkay Garoonka Anfield
Talaado, April, 24, 2018 (HOL) - Liverpool ayaa xaqiijisay in ay tahay koox awood badan kaddib markii ay 5-2 ku xasuuqday Xidigaha kooxda Roma kaddib cayaar leysku arkay Garoonka Anfiel ee dalka Egland oo qeyb ka aheyd Afar dhamaadka Champions league
Markii la gaaray daqiiqadii 19
ee cayaarta Roma ayaa heshay wax u muuqaal ekaa Goolkii ugu horeeyay ee
kulanka, kaddib markii Kolarov Laad uu ka soo tuuray meel ka
baxsan Gool Liverpool uu Birta ku dhuftay.
Laakiin daqiiqadii
35aad Maxamed Saalax ayaa kooxdiisii hore uga naxsaday Goolkii ugu horeeyay cayaarta
oo ahaa mid aad u qurux badan oo si wanaagsan looga soo shaqeeyay, laakiin
Saalax ayaa markii uu Goolka dhaliyay u muujiyay kooxdiisii hore ee Roma
xushmad isaga oo diiday in uu ku dabaal dego.
Mar kale Maxamed Saalax ayaa
daqiiqadii 45 aad dhaliyay Goolkii labaad ee Liverpool, kaddib markii uu Goolhaya
daba-mariyay Laad siweyn looga fikiray.
Wareegii Koowaad ee cayaarta ayaa lagu
kala nastay 2-0 oo ay ku hogaamineysay cayaarta Liverpool, laakiin markii
leysku soo laabtay ayeey dhaceen mucjisooyin kale oo Room ka yaabsaday.
Saddexda Gool ee kale Liverpool waxaa u
dhaliyay cayaaryahannada kala ah Sadio
Mane iyo Firmino oo Labo gool la yimid, sidaa ayeey Liverpool 5-0 ku
hogaamineysay cayaarta ilaa laga gaaro daqiiqadihii ugu danbeeyay.
Laakiin Roma ayeey rajadeedii dib u soo laabtay kaddib
markii dhamaadka cayaarta la soo shir
tageen Labo Gool oo mid ka mid ah u ahaa Rigoore, waxaana ay labadan Gool u muuqdaan kuwo ka
caawin kara lugta danbe ee kulanka ay isaga horimanayaan Xidigaha Liverpool.
Dad badan ayaa aamisan in tababare Jurgen Klopp uu
sameeyay qalad weyn kaddib markii dhamaadkii cayaarta uu garoonka ka saaray
Maxamed Saalax, taasoo dhiiri-galin u noqotay weerar yahannada Roma oo ugu
danbeyntii Labo Gool helay.
C/raxmaan Diini, Hiiraan Online
[email protected]