Dowlada Imaaraadka oo joojisay Howlihii Caafimaad iyo Militari oo ay ka wadey Soomaaliya
Isniin,, April, 16, 2018 (HOL)- Dowladda
Imaaraadka Carabta ayaa u muuqata mid gabi ahaanba soo afjareysa xiriirkii
dhinacyada badnaa ee kala dhaxeeya Soomaaliya, iyadoo gabi ahaanba joojisay
taageeradii Militari iyo bulsho oo ay ka waday Soomaaliya.
Adeegyada la joojiyay ayaa
waxaa ka mid ah howlihii Isbitaalka Sheekh Saayid oo ay
taageerto dawladda Imaaraadka Carabta, kaddib markii uu
xumaaday xiriirka u dhexeeya dalalka Soomaaliya iyo Isutaga Imaaraadka Carabta.
Isbitaalkan
ayaa adeegyo caafimaad oo bilaash ah u
fidin jiray dadka danyarta ah iyadoo ay ka faa’ideysan jireen kumannaan dadka
reer Muqdisho ah.
Waxaa
kaloo ay agabkooda ka xirxirteen xero xero ay ku tababari jireen Militariga
Soomaaliya oo ku taala magaalada Muqdisho.
Saacadihii
ugu danbeeyay ayaa xerada oo lagu magacaabo Jen Gordan waxaa laga daabulayay
qalab ku jira kontaynarro, kuwaa oo la geeyay safaaradda Iimaaraadka Carabta.
Iimaaraadka
ayaa hadal ay soo saareen ku sheegay inay joojiyeen hawlihii la xiriiray
tababarrada milateriga ee ay soo wadeen tan iyo 2014, waxay kaloo bixin jireen mushaarka ciidamo ay
iyagu tababareen.
Horraantii
todobaadkan ayaa sidoo kale is mariwaa saacado qaatay wuxuu ka dhacay garoonka
dayaaradaha ee Boosaaso, kaddib markii in muddo ah la xannibay hub la sheegay
in la saari lahaa dayaarad halkaa ka qaadi lahayd tababareyaal Militari,
dayaaradda iyo dadkii raaci lahaa ayaa markii dambe halkaa ka duulay.
Laakiin
dowladda Soomaaliya ayaa dhinaceeda qabta in ay jiri karaan fursado lagu wada
hadli karo si khilaafka jira looga gudbo sida uu warbaahinta u sheegay wasiirka
arrimaha dibada Soomaaliya Axmed Ciise
Cawad.
Madaxweynaha Puntland, C/weli
Max'ed Cali Gaas ayaa isna ka codsaday in tabarayaasha milateriga ay dib u soo
laabtaan.
Inkasto
horeyba uu madmadow uga jiray xiriirka labada dowladdood ayaa haddana la oran
karaa waxaa dabkii shidnaa basiin ku sii daray tallaabadii dowladda Soomaaliya
ay kula wareegtay lacag dhan $ 9 million iyo 600 Kun oo dollar oo lagu siday
diyaarad laga leeyahay dalka Iskutaga Imaaraadka gudaha garoonka diyaaradaha
Muqdisho, arintaa oo siweyn uga careysiisay dowladda Imaaraadka.
C/raxmaan Diini, Hiiraan Online
[email protected]
