Madaxweyne ku xigeenka Somaliland oo ka warbixiyey kulamo uu la yeeshay madaxda Sucuudiga
Jimco, September, 07, 2018 (HOL)-Madaxweyne ku
xigeenka Somaliland C/raxmaan C/llaahi Ismaaciil Saylici iyo wefti uu
hogaaminayo ayaa dalka dib ugu soo laabtay kadib socdaal shaqo iyo acmaasha
xajka isugu jira oo uu ugu maqnaa dalka boqortooyada Sucuudiga.
Waftidani uu hogaaminaayo madaxweyne ku-xigeenku
ayaa waxa garoonka diyaaradaha ee magaalada Hargaysa kusoo dhaweeyay
boqolaal qof oo isugu jira madaxda dhaqanka, siyaasiyiin, aqoonyahano iyo
haween dhamaantood ruxaayay caleemo-qoyan iyo calanka Somaliland.
Boqortooyada Sucuudiga ayaa diyaarad khaas ah ku
soo qaaday oo dalka ku keenay, waxaana ujeedadda safarkooda ka warbixiyey
madaxweyne ku xigeenka Somaliland Saylici, waxaanu yidhi "Waxaanu u mahad
celinayaa boqorka sucuudiga isaga iyo shacabkiisaba, annagoo sidana passport
kala duwan hadana dhamaantayo waxa nagoolu qoray Jinsiyadda Jamhuuriyadda
Somaliland, waxa naloo qaabilay si wanaagsan, marti qaad ayuu sameeyay boqorku
anaguna dadkii ayaanu kamid ahayn, waxa kale oo taa sii dheerayd in uu anniga boqorku
igu daray 11-kii qof ee ugu sareeyay kulankaasi, waxa kale oo aan la iloobi
karin waji fur-naanta nagula soo dhaweeyay, markii xajkii noo dhamaaday waxaanu
guda galnay hawlaha qarankeena waxaanu la kulanay masuuliyiin sar-sare oo ka
tirsan xukuumada, ganacsato, rugta ganacsiga jidda oo muddo dheer jirtay
waxaanu dhamaantood kala kulanay inay yihiin dad ina danaynaya oo jecel inuu
ina dhex maro xidhiidh weyni waxa aan sii qaaday dhambaalo madaxweynaha
Somaliland hore ugu qoray dawladda sucuudiga”
Waxaanu intaas ku daray “Dhamaan wixii aanu
codsanayna waji wanaagsan ayay ku aqbaleen haday furitaanka xoolaha tahay iyo
haday baasaaboorkeena inay aqbalaan tahayba, waxay noo sheegeen inay
ganacsatadooda ku boorinayaan inay maal-gashadaan dalka Somaliland dhamaan
intii ka qayb gashay hawshayadaasna aad baan ugu mahad celinayaa"
Madaxweynaha waxa safarkiisa ku wehelinayey
Wasiir ku xigeenka Warfaafinta, Maxamed Muuse Abees, wasiirka Xidhiidhka
Golayaasha iyo arrimaha dastuurka Maxamed Xaaji Aadan, Sidoo kale waxa weftiga
la socday Siyaasi Maxamed Nuur Caraale Duur oo ka tirsan xisbiga WADDANI.
Barkhad-ladiif M. Cumar, Hiiraan Online
[email protected]
Hargeysa, Somaliland.