Dowladda Soomaaliya oo Mareykanka ka dalbatay xoojiyaan weerarradda ka dhanka ah Al-shabaab
Jimco, September, 07, 2018 (HOL)–Taliyaha ciidamada xoogga dalka Soomaaliya
S/gaas Daahir Aadan Cilmi (Indhaqarshe) ayaa xafiiskiisa ku qaabilay saraakiil
ka socotay dawladda Mareykanka, waxaana ay ka wada hadleen dib u dhiska
ciidanka iyo arrimo kale.
Si gaar ah ayaa labada dhinac waxay uga wada
hadleen siddii dawladda Mareykanka ay ciidamada xoogga dalka uga taageeri laheyd
xoreynta dalka, tababarka ciidamada, is dhaafsiga qibadaha dhanka ciidamada
iyo qodobo kale.
Taliyaha ciidamada xoogga dalka Soomaaliya S/gaas
Daahir Aadan Cilmi ayaa waxaa uu dawladda Mareykanka ka dalbaday in ay
kordhiyaan taageerida, tababarada ay siinayaan ciidamada xoogga dalka iyo
weerarada ay Al- shabaab la beegsanayaan.
“Madaxweyne Farmaajo waxa uu dalbaday in Al shabaab
si deg deg ah looga saaro dalka, taas bedelkeedana waxaa ay keentay in dowladda
ay shaaciso inay qaadi doonto dagaal xoogan, waxaana dagaalkaasi dalka looga
saarayo cadowga leynaya shacabka”. ayuu yiri taliyaha xoogga.
Dawladda Mareykanka ayaa ka mid ah dowladaha sida
gaarka ah Soomaaliya uga caawiya dhanka tababarada ciidamada qalabka sida ee
Soomaaliyeed.
C/raxmaan
Diini, Hiiraan Online
[email protected]
