Madaxweyne Cagjar oo sheegay in la soo celinayo dhul si sharci darro ah loo qaatay
Khamiis, September, 27, 2018 (HOL) – Madaxweynaha dowlad degaanka
Soomaalida Mustafa Maxamed Cumar Cagjar ayaa bartiisa facebooka ku qoray in
xukuumadiisa ay u qorsheysan tahay inay soo celiso dhul ay sheegtay in si
sharci daro ah loo qaatay.
Madaxweynea Cagjar ayaa sheegay in ay hayaan xogta
ku saabsan dhul iyo hanta badan oo ay boobeen dad aan Soomaali aheyn oo u badan
saraakiil ciidan, si dhaqsi ahna ay talaabo uga qaadi doonaan islamarkaana ula
wareegi doonaan hantidaasi shacabka laga boobay.
Dadka arrimaha siyaasadda falanqeeya ayaa waxaa ay
sheegeen dhulalka ay qaateen saraakiisha ciidanka inay ahaayeen kuwa iyaga lagu
naas nuujinayay, maadaama iyaga ay udub dhexaad u ahaayeen dowladdii hore.
Shacabka dowlad degaanka Soomaalida ayaa waxaa ay
sheegeen in ay soo dhaweynayaan talaabada uu qaaday madaxweyne Mustafa Cagjar,
waxayna tilmaameen inay dib u soo laabaneyso cadaaladda oo ay sheegeen inay
horey u luntay.
Xukuumadda cusub ee Soomaalida ayaa marka ay
xilka qabatay isbedel ku sameysay waxyaabo badan oo xukuumadii ka horeysay la
timid, loona arkayay inay aad ugu muujineysay Itoobiyaanimada dadka Soomaalida
ee gobolkaaasi degan.
C/raxmaan Diini, Hiiraan
Online
[email protected]
