Wasaaradda Xanaanada Xoolaha Soomaaliya oo bilowday hirgalinta mashruuc looga maarmayo isticmaalka dhuxusha
Arbaco, September,
26, 2018 (HOL) -Mashruucaan ayaa loogu talo galay in lagu dhiira geliyo
haweenka ka ganacsada dhuxusha si loo yareeyo ka ganacsiga dhuxusha oo keeni
karta nabaad guur saameyn ku yelata deegaanka, waxaana badalkii dhuxusha
wasaaradda Xanaanad Xoolaha Dhirta iyo Daaqa oo wada arintan ay
guddoonsiisay haweenkan Gaas, iyadoo mashruucan lagu bilaabay haweenka ka
ganacsada dhuxusha ee degmada Hodan.
Munaasabadda oo lagu qabtay xarunta wasaaradda
waxaa ka qeyb galay madaxda wasaaradda, waiilo ka socday UNDP iyo Midowga
Yurub, masuuliyiin ka tirsan maamulka gobolka Banaadir iyo guddoomiyaha degmada
Hodan C/xakiin Dhagajuun oo degmadiisa lagu bilaabay mashruucan.
CabdiQani Raage Baroow isku xiraha dowlada
Soomaaliya iyo Hayadaha Qaramada Midoobay ayaa faah faahin ka bixiyay Howshan
haweenka lagu siinaayo gaaska cuntada lagu karsado si loo yareeyo ka ganacsiga
dhuxusha islamarkaana hoos loogu dhigaayo jarista dhirta,
Wasiir ku xigeenka wasaaradda Xanaanada Xoolaha
Dhirta iyo Daaqa C/kariin Khaliif Cabdi oo ugu horeyn halkaasi kahadlay ayaa
sheegay in mashruucaan lagu bilaabay haweenka degmada Hodan.
“Mashruucaan oo ah mid waxtar leh waxaan ku
bilownay haweenka ka gacasada Dhuxusha ee kunool degmada Hodan, waxaana
rejeyneynaa iney ka faaiideystaan”ayuu yiri.
Madax ka socotay UNDP iyo Midowga Yurub oo
iyagana halkaasi kahadlay ayaa sheegay in wasaaradda ay kala shaqeynayaan sidii
looga maarmi lahaa ka ganacsiga dhuxusha.
Raxma Maxamed Jimcaale oo kamid ah haweenka ka
faaiideysanaya Barnaamijkan ayaa tilmaamtay in talaabadan ay ku dhiira
gelineyso iney ka maarmaan ka ganacsiga Dhuxusha.
“Anaga hadiiba aan helnay dhiira gelintaan wan ku
faraxsanahaya waana joojineynaa ka ganacsiga dhuxusha”ayey tiri Raxma Maxamed
Jimcaale.
Guddoomiyaha Amniga iyo Siyaasadda Maamulka
Gobolka Banaadir Maxamed C/laahi Tuulax ayaa ku bogaadiyey haweenka in
ganacsiga dhuxusha oo halis ku ah deegaanka ay tahay waqtigii ay joojin
lahaayeen.
“Waad ogtihiin deegaanka ayey halis ku tahay in
laga ganacsado Dhuxusha, maadaama hadda Gaas la idin guddoonsiiyey waa inaad la
jaanqaadaan dunida sida hadda ay tahay oo aad ka gudubtaan ganacsiga
dhuxusha”ayuu yiri.
Wasiirka Wasaaradda Xanaanada Xoolaha DHirta iyo Daaqa Xukuumadda Soomaaliya
Xildhibaan Xuseen Maxamuud Sheekh Xuseen oo agabkii ay ku ganacsan lahaayeen
guddoonsiiyey haweenka degmada Hodan ayaa sheegay in si walba oo ay ku joojin karaan
jarista iyo ka ganacsiga dhirta ay sameynayaan.
“Wasaaraddu wax waliba oo arintaan ay ku joojin karto wey sameeneysaa, cid
waliba oo nagu taageertay mashruucaana aad ayaan ugu mahad celineynaa”ayuu yiri
wasiirka.