Maxkamada ciidamadda Puntland oo dil ku xukuntay eedeysanayaal ka tirsan Daacish iyo Al-Shabaab
Arbaco, September, 26, 2018 (HOL)–Maxkamadda ciidamadda qalabka sida ee shanta gobol ee Puntland ayaa maanta dil toogasho waxa ay ku xukuntay labo nin oo la sheegay in ay ka tirsanaayeen al-Shabaab iyo nin-kale oo ku eedeysnaa ka mid ahaanshaha ururka Daacish.
Sidoo kale ,Maxkamadda ayaa xukun xabsi daa’in ah waxa ay ku riday saddex nin oo ku eedaysnaa inay xiriir ay la la hayeen ururka al-Shabaab.
Xasan Laamow Aadan oo 39 jir ah ,kuna eedeysnaa ka mid ahaanshaha ururka Daacish, Yaasiin Cismaan Cabdi Saalax oo 23 jir ah iyo Xasan Maxamed Cali Ibraahin oo 26 jir ah oo ku eedeysnaa ka mid ahaanshaha ururka al-Shabaab ayaa maxkamadda waxay ku xukuntay dil toogasho.
Maxkamadda ayaa xabsi daa’in ah waxaa ay ku xukuntay , Xuseen Jeylaani Xasan oo 25 jir ah, Cabdi Cumar Iftiin oo 27 jir ah iyo Bishaar Cismaan Seed oo dhammaantood maxkamadda ay sheegtay inay ku heshay ka mid ahaanshaha ururka al-Shabaab.
Xeer ilaalinta maxkamadda ayaa sidoo kale baaritaan caafimaad u direy Xasan Maxamed Naadi, si loo hubiyo taam ahaanshaha maskaxdiisa .
Eedeysanayaasha maanta maxkamadda la horkeennay waxaa kalo ka mid ahaa labo xidigle Maxamed Jaamac Saciid oo 41 jir ah oo ka tirsanaa ciidanka Puntland gaar ahaana guuto bari oo dambi dil ah lugu helay, waxaana lugu xukumay shan sanno oo xabsi ah iyo bixinta magta marxuunka gacantiisa ku baxay.
Gabagabadii, maxkamadda ciidamadda qalabka sida ee shanta gobol ee Puntland ayaa shan sanno oo xabsi ah waxaa ay ku ridey Xasan Cabdiqaadir Yuusuf ,halka Cabdullaahi Maxamed Axmed oo ka mid ahaa ciidanka dekedda magaalada Boosaaso ay maxkamaddu fasaxdey markii la sheegay in wax dambi ah lugu waayay.
