Arbaco, September, 26, 2018 (HOL) -BBC ayaa
hadda shaaca ka qaadday qofka sannadkan 2018-ka hantay abaal marinta ay bixiso
BBC World News ee loogu magac daray Komla Dumor.
Abaal marintan ayaa looga gol leeyahay in lagu ogaado laguna hormariyo dadka
ka soo jeeda Africa ee leh xirfadaha cusub ee heerka sare ah.
Waihiga Mwaura, oo ah wariye Kenyan ah oo soo tabiya wararka Telefishinka
ayaa sannadkan ku guuleystay.
"Anigoo ka maqan magaalada, oo damaashaadka fasaxa kula jiray
xaaskeyga, ayaan xiriirsaday internet-ka hoteelka, waxaan galay ciwaankeyga,
waxaana billaabay inaan la sheekeysto qof ka tirsan BBC-da, anigu waxaan
filayay in la iga rabo wareysi kale, laakiin wixii xigay ee ay ii sheegeen
wuxuu ahaa inaan guuleystay" ayuu yiri.
Waihiga Mwaura, wuxuu warka 9-ka fiidnimo ka aqriyaa Telefishinka laga
leeyahay Kenya ee Citizen TV.
Sidoo kale waa saxafi si weyn loo yaqaanno loona qaddariyo oo soo tabiya
warar fara badan oo ku saabsan xaaladaha taagan, siyaasadda iyo waliba
ciyaaraha.
Abaal marintan ayaa loo aasaasay in lagu sharfo Komla Dumor, oo ahaa wariye
u dhashay dalka Ghana oo ay xirfaddiisu ahayd mid qeyrul caadi ah, kaasoo warka
ka akhrin jiray Telefishinka BBC World News, wuxuuna si kadis ah u geeriyooday
sannadkii 2014-kii, isagoo ay da'diisu ahayd 41 sano.
Garsooreyaasha qiimeynayay dadka abaal marintan la siinayo ayaa eega
shaksiyaadka isku tiirsan ee ka shaqeeya Afrika, leh awood iyo xirfad
saxafinimo oo laga dheehan karo marka ay hawada ku jiraan, aad ugu xeel dheer
habka loo sheego wararka ku saabsan Afrika, isla markaana leh hiigsi dhinaca
mustaqbalka ah oo uu ku doonayaan iney xiddig uga noqdaan qaaradda.
Waihiga Mwaura oo hadalkiisa sii wata ayaa yiri: "Komla Dumor wax weyn
ayuu ii ahaa. Waa nin aan ka sheekeyneyno qiyaastii saddex ama afar sano ka dib
geeridiisa. Xitaa haddii aan wixii uu sameeyay ka sameeyo boqolkiiba toban ama
boqolkiiba labaatan ka mid ah, waxaan dareemayaa inaan kaalinteyda ka qaatay
horumarinta saxaafadda".
Waihiga ayaa muddo saddex bilood ah joogi doona xarunta dhexe ee BBC ee
magaalada London.
Wuxuu sidoo kale u safri doonaa Afrika, si uu sheeko uga soo sameeyo -
wuxuuna sheekadaas la wadaagi doonaa qaaradda iyo guud ahaan caalamka, isagoo
adeegsanaya barnaamijyada wajiyada badan ee ee BBC News, Sannadkii 4aad ayey
abaal marintan socotaa.
Xigasho BBC