Wasiirka loo magacaabay wasaaradda deegaanka iyo isbedelka cimilada Puntland oo xilka loo dhaariyay
Isniin, September, 24, 2018 (HOL)–
Wasiirka galinkii dambe ee Axaddii
shalay loo magacaabay wasaaradda deegaanka iyo isbedelka cimilada Puntland,
Saleebaan Xaaji Cabdalle Sardheeye ayaa maanta xilka si rasmi ah loogu
dhaariyay, kaddib markii uu xilka iska casilay Cali Cabdullaahi Warsame.
Munaasabad kooban oo ka dhacday
xarunta madaxtooyada magaalada Boosaaso ayaa wasiirka lugu dhaariyay, iyadoo uu
goob-joog ahaa madaxweynaha Puntland, Cabdiweli Gaas.
Cabdiweli , ayaa kula dardarmay
wasiirka cusub ee wasaaradda deegaanka iyo isbedelka cimilada in si daacad nimo
leh uu ugu adeego shacabka, si xilkasnimo lehna uguto waajibaadkiisa shaqo,
waxaa kalo uu madaxweynaha Puntland u sheegay wasiirka cusub in uu ka
dhawr-soonaado wax walba oo shaqadiisa hakad gelinaya.
Saleebaan Xaaji , wasiirka cusub ee
deegaanka iyo isbedelka cimilada oo xilkan qabanaya, iyadoo muddo ka yar afar
bilood ay ka dhimantahay xil heynta xukuumadda talada heysa ee Puntland ayaa
dhankiisa ballanqaaday si hufan inuu ugu adeegi doono dowladda iyo shacabka.
Iman Mohamed Jama, Hiiraan Online