Isniin, September, 24, 2018 (HOL)–Waxaa mar kale
dib u dhac ku yimid shir uu ku baaqay madaxweynaha dowladda Soomaaliya Maxamed
Cabdullaahi Farmaajo uu ku baaqay, kaa oo qorshuhu ahaa in maanta oo ay
taariikhdu ku beegan tahay 24ka bishan in uu magaalada Muqdisho uga furmo
madaxda dowlad gobolleedka Galmudug.
Madaxweynaha Galmudug Axmed Ducaale Geelle Xaaf
ayaa ku gacan-seyray baaqa madaxweyne Farmaajo, waxaana uu ku tilmaamay
khilaafka ka dhax taagan Galmudug mid asalkiisaba ka soo jeeda faragalin
dowladdu ay ku heyso maamulka Galmudug ismari-waaga taaganna yahay mid laga soo
abaabulay sida uu hadalka u dhiggay madaxtooyada Soomaaliya.
Waa shirkii labaad oo ku dhici waayo waqtiggii uu
u qabtay madaxweynaha Soomaaliya, waxaa horay u baaqday shir uu madaxweynuhu
madaxda dowlad gobolleedyada isugu yeeray, kaasoo qorsuhu ahaa in 17kii bishan
uu ka furmo magaalada Muqdisho, waxaa shirkaa ka hor yimid oo diiday golaha
iskaashigga dowlad gobolleedyada.
Dowladda ayaa hadda dhax maquuraneysa mucaaradad
xooggan oo ay kala kulmeyso madaxda dowlad gobolleedyada qeybta ka ah
federaalka, inkastoo madaxweynaha Hirshabeelle Maxamed Cabdi Waare oo dhinaca
kale ah guddoomiye ku-xigeen golaha Iskaashiga dowlad gobolleedyada ku
dhawaaqay in si madaxbannaan uu ula heshiiyay dowladda.
Madaxweyne Farmaajo ayaa la sheegay in xalinta
khilaafka Galmudug uu uga baaqday ka qeyb-galka shirka golaha guud ee Qaramada
Midoobey, laakiin hadda waxaa muuqaneysa ay meesha ka baxday doonistii
madaxweynaha ee aheyd in shir leysugu keeno dhinacyada isku haya hoggaanka
Galmudug.
C/raxmaan Diini, Hiiraan
Online
[email protected]
