Maxkamada ciidamada ayaa xukun isugu jira dil iyo xarig ku riday Lix eedeysane magaalada Beledweyne
Axad, September, 23, 2018 (HOL) -Maxkamada
ciidamada qalabka sida ayaa maanta dhagaysatay dacwad loo haysto lix ruux
kuwaasoo lagu eedeeyay inay gacan siinayeen Mahad Xuseen Shiidow oo maxkamada
dil toogasho ah hore ugu xukuntay.
Lixda eedeysane ayaa soo abaabulay weerar ay dad
shacab ku dhinteen 28-ka bishii tegtay iyagoo gacan siinayay Mahad Xuseen
Shiidow oo wade bajaajle ku dilay degmada Beledweyn ee gobalka Hiiraan.
Saraakiil ka socota maxkamadda ciidamada qalaba
sida oo uu horkacayo guddoomiyaha maxkamadda darajada koowaad ee ciidamada
qalabka sida Xassan Cali Nuur Shuute ayaa Baladweyne u yimid baarista falalkii
ka dhacay Baladweyne kadib markii la dilay Yaasiin Cali Saney.
Xafiiska Xeer Ilaalinta ayaa u gudbiyay
maxkamadda eedda ka dhanka ah lixda eedaysane iyagoo soo bandhigay cadaymo laga
qoray eedeysanayaasha, wuxuu sidoo kale Maxkamadda horgeeyay xafiiska xeer
ilaalinta Markhaatiyaal deegaanka ah ee goobjoogga u ahaa dhacdada ay ku
dhinteen Laba ruux midna uu ku dhaawacmay.
Maxkamadda oo ka duuleysa arrimahaasi ayaa ugu
dambeyn go’aan kasoo saartay Lixda eedeysane oo mid maqan yahay.
Cabdisamad Maxamed Cusmaan (Af-dheere) oo ka
tirsanaa guutada Shanaad, qeybta 27-aad ee Ciidanka Xoogga Dalka Soomaaliya
ayay Maxkamaddu ku heshay in uu ahaa shaqsiga dilka geystay waxa ayna ku
xukuntay Dil toogasha halka Aadan cali cilmi, Burhaan yusuf nuur, Cabdifitaax
bedel qoofiyow iyo Maxamed cali cilmi ay kuwada xukuntay Min Shan (5)-sano oo
Xabsi Ciidan ah.
Maxkamadda ayaa sidoo kale amartay in xabsiga
laga sii daayo Maxamed yuusuf tifow hadii aysan jirin dambiya kale oo loo
heysto, sida uu u sheegay Warbaahinta Gaashaanle Sare Xasan Cali Nuur Shuute
Guddoomiyaha Maxkamadda Darajada koowaad ee Ciidamada Qalabka Sida.
Ugu dambeyntii Xukunsanayaasha ayaa heysta fursad
kale oo ay racfaan uga qaadan karan hadii aysan ku qancin xukunka.
C/raxmaan Diini, Hiiraan
Online
[email protected]
