Talaado, September, 18, 2018 (HOL) –Taliyaha ciidanka Daraawiishta
Jubbaland ee gobolka Gedo,Jen Jamaal Xasan Farey ayaa sheegay ciidammada
amniga Jubbaland inay la wareegeen galinkii dambe ee Isniintii saldhig ay
al-Shabaab ku diyaarinayeen weerarro ka dhan ah ciidanka Daraawiishta
Jubbaland.
"Ciidanmadu waxaa ay weerarreen
koox ka tirsan al-Shabaab oo deegaan ku dhow degmada Baladxaawo ku diyaarinayay
weerar ka dhan ah ciidanka Daraawiishta Jubbaland." ayuu yiri Jen Farey.
Weerarka inta uu socday waxaa ku
geeryooday sarkaal ka tirsan ciidanka Jubbaland oo magaciisa lugu sheegay Cabdi
Cabdullaahi Xasan oo darajadiisa ciidan ay ahayd Gaashaanle, afar askari oo
kale oo ka tirsan ciidanka Jubbaland ayaa geeryooday, sida u sheegay taliyaha
ciidanka Daraawiishta Jubbaland ee gobolka Gedo.
Jeneraalka waxaa kalo u sheegay inay
al-Shabaab ka qabsadeen gaari iyo hub, isagoo inta ku daray weerarka inay ku
dileen tiro ka mid ah dagaalyahannada al-Shabaab, xilligana ay gacanta ku
hayaan halka uu ka dhacay weerarka.
Kooxda al-Shabaab oo weerarkan ka
hadashay ayaa dhankeeda guul ka sheegatay,iyagoo marka ku baahiyay warbaahinta
afkooda ku hadasha in 10 askari ay ka dileen ciidanka Jubbaland, ma jirto warar
madax bannaan oo laga helay dagaalka al-Shabaab iyo ciidanka Jubbaland.