Dib u dhac ku yimid kulan maanta Muqdisho uga furmi lahaa dowladda dhexe iyo madaxda dowlad gobolleedyada
Isniin, September, 17, 2018 (HOL) – Dib
u dhac ayaa ku yimid shirkii wadatashiga ahaa ee uu madaxweyne Maxamed Cabdullaahi Farmaajo
uu isugu yeeray madaxda dowlad goboleedyada, kaa oo uu qorshuhu ahaa in 17ka
bishan oo maanta ku beegan ka furmo magaalada Muqdisho.
Dib u dhacay ayaa loo sababeynayaa kadib markii madaxda maamul goboleedyada
dalbadeen in ka hor shirka la siiyo sida ay hadalka u dhiggeen dammaanad qaad
buuxa oo siyaasadeed, islamarkaana la helo gacan kale oo saddexaad oo arrimaha
leysku hayo dhax-dhaxaadisa.
Qodobbada looga hadli lahaa shirka waxaa ka mid
ah arrimaha amniga, dagaalka ka dhanka ah Al Shabaab iyo Daacish,
hirgelinka siyaasadda loo dhan yahay iyo ka shaqeynta arrimaha horumarinta
dhaqaalaha, si dalka loo gaarsiiyo isku filnaasho iyo horumar waara.
Golaha Amniga Qaranka waxaa qeyb ka ah Madaxda
maamul goboleedyadda oo shir ay ku yeesheen dhawaan magaalada Kismaayo kaga
dhawaaqay in ay hakiyeen xiriirkii kala dhaxeeyay dowladda Soomaaliya, ilaa
amar dambe.
Dadka falanqeeya arrimaha siyaasadda ayaa waxa ay
sheegeen in dowladda federaalka ay ka gaabisay in maamul goboleedyada ay kala
hadasho tabashadooda, midaasina aanan loo baahneyn, waxaa hada socda dadaalo ay
wadaan aqalka sare oo ay isugu soo dhaweynayaan dhinacyadan uu khilaafka ka
dhaxeeyo.
C/raxmaan Diini, Hiiraan
Online
[email protected]
