Axad, September, 16, 2018 (HOL) –Wararka ka imaanaya dalka Burkina Faso waxay sheegayaan in kooxo looga shakiyay inay yihiin jihaad doon ay 9 qof ku dileen labo weerar oo kala duwan oo ay ku qaaden koonfur bari dalkaasi
Bayaan kasoo baxday xafiiska barasaabka gobolka Kompienga ayaa lagu sheegay in mid kamid ah weeraradaasi lala bartilmaamedsay masjid ku yaalla tuulada Diabara.
Waxaa weerarkaasi ku dhintay imaamka masaajidka iyo afar qof oo kale. Hal qof oo kale ayaa sidoo kale u dhintay dhaawacii soo gaaray.
Weerarka labaad waxaa lagu dilay saddex qof oo isku qoys ah oo degenaa meel aan ka fogeyn tuulada weerarka lagu qaaday.
Sanadihi ugu dambeeyay dalka Burkina Faso waxaa kusoo badanayay rabshadaha la xiriira argagixisada.
Lixdan qof ayaa ku dhimatay weeraro saddex ah oo lagu qaaday caasimadda Ouagadougou labadii sano ee lasoo dhafay.
Xigasho/BBC