Sabti, September, 15, 2018 (HOL)–
Guddiga madasha nabaddaynta gobolka
Mudug ayaa maanta ku soo bandhigay magaalada Gaalkacyo ee xarunta gobolka Mudug
xeer ,si xal waara looga gaaro colaadda iyo dagaallada soo noq noqday.
"Howshan waxay ahayd mid muddo
socotay, si loo soo afjaro colaadda soo noq noqatay ee gobolka iyo isku
dhacyada aan xal loo helin , waxaa lugu heshiiyay in la diyaariyo
xeerkan." ayuu yiri Xabiib Xirsi Barre oo ah xoghaynta odayaasha
nabaddaynta gobalka Mudug.
Qodobbada ugu weyn ee xeerka ku jira
oo lugu saleeyay shareecadda islaamka -waxaa ka mid ah 'in la dilo qofkii qof
dila iyo in la soo celiyo xoolihii la dhaco, qofkii dhacana ciqaab la
marsiiyo'.Waxaa rasmi ahaan xeerka loo saxiixi doonna 21 bishaan oo ku beegan
maalinta nabadda adduunka.
Kulanka lugu soo bandhigay xeerka ay diyaariyeen
odayaasha nabaddaynta gobolka, ayaa dhanka kale lugu dhiirrigaliyay nabadda
gobolka iyo ciidammada isku-dhafka ah,waxaana goobjoog ahaa oo odayaasha
dhaqanka iyo qeybaha bulshada kulanka kala qeybgalay taliyihii hore ee ciidanka
xoogga dalka,Cabdiwali Xuseen Jaamac Gorod.
Iman Mohamed Jama, Hiiraan Online