Sabti, September, 15, 2018
(HOL)– Iyadoo aad moodo in uu sii adkaanayo khilaafka u dhaxeeya madaxda ugu
sareysa maamul gobolleedka Galmudug ayaa ayaa waxaa ka soconaya degmooyinka
Dhuusa-Mareeb iyo Cadaado kulamo siyaasadeed oo iska soo horjeeda.
Maalintii shalay waxaa gaaray
magaalada Cadaado madaxweyne ku-xigeenka Galmudug Maxamed Cabdi Xaanshi Carab iyo guddoomiyaha
xilka laga qaaday Cali Gacal Casir oo halkaa ka wada shirar a yla leeyihiin
xildhibaanno iyo siyaasiyiin ku sugan Cadaado.
Ilo xog ogaal ah ayaa sheegaya
in dhinaca kale labada mas’uul abaabulayaan kulamo la doonayo in xilka looga
qaado madaxweynaha Galmudug Axmed Ducaale Geelle Xaaf.
Dhawaan ayeey aheyd markii
kulan magaalada Dhuusa-mareeb ay ku yeesheen xildhibaanno ka badan 146 mudane
isku raaceen in kalsoonida lagala noqdo guddoomiye Cali Gacal Casir oo
dhinaciisa ka biyo diiday xil ka qaadista lagu sameeyay.
Sidoo kale xildhibaannada
baarlamaanka Galmudug ee fadhiggoodu yahay Dhuusa-Mareeb ayaa isku diyaarinaya
mooshin ay xilka uga qaadayaan madaxweyne ku-xigeenka Galmudug oo hadda ku
sugan Cadaado sida uu baarlamaanka ka hor sheegay guddoomiye ku-xigeenka koowaad
baarlamaanka Galmudug Xareed Cali Xareed.
Lama oga halka ay saldhigan
doonto xiisada siyaasadeed ee sii xoogeysatay ee u dhaxeysa madaxda ugu sareysa
maamul gobolleedka Galmudug.
C/raxmaan
Diini, Hiiraan Online
[email protected]