Maamulka Gobolka Banaadir iyo Midowga Afrika oo ka wadahadalay tacadiyada ka dhanka ah Haweenka
Sabti, September, 01, 2018 (HOL)– Duqa Muqdisho
ahna Guddoomiyaha Gobolka Banaadir Mudane Cabdirixmaan Cumar Cusmaan
(Eng.Yarisow) ayaa la kulmay Wakiilka Gaarka ah ee Midowga Afrika u fadhiya
Soomaaliya Danjire Francisco Medara.
Guddoomiyaha iyo Danjiraha ayaa ka wada hadlay arrimaha amniga, ilaalinta
xuquuqul iinsaanka iyo dadaallada Maamulka Gobolka Banaadir uu ugu jiro xal u
helista dhibaatooyinka haysta dadka barakacayaasha ah.
Eng.Yarisow ayaa tilmamay muhiimadda ay leedahay
in Saraakiisha Howgalka Midowga Afrika ee Soomaaliya (AMISOM) ay kala
shaqeeyaan hay’adaha heer Federaal iyo heer Gobol xal u helista tabashooyinka
ka dhanka ah xuquuqda haweenka.
Guddoomiyaha ayaa sheegay in Maamulka Gobolka
Banaadir ay magacaabayaan guddi ka shaqeeya ilaalinta xuquuqul insaanka, gaar
ahaan baaritaanka eedaymaha soo gaara Gobolka ee ku saabsan tacaddiyada.
“Maamulka Gobolka Banaadir waxa uu ka shaqeynayaa
sidii loo xaqiijin lahaa ilaalinta karaamada iyo sharafta bulshada Gobolka,
iyadoona aan kaashaneyno dhammaan dhinacyada ay khuseyso.”
Dhankiisa, Danjire Francisco Medara ayaa
bogaadiyey qorsheyaasha Maamulka Gobolka Banaadir ee ku aaddan ilaalinta
xuquuqul insaanka, isagoona ballaan qaaday in ay kaalintooda ka qaadanayaan
baaritaannada ku saabsan arrinkan.
Sidoo kale, Guddoomiyaha Gobolka Banaadir Mudane
Cabdirixmaan Cumar Cismaan (Eng.Yarisow) iyo Danjiraha Midowga Afrika ee
Soomaaliya Mudane Francisco Medara ayaa xaqiijiyey muhiimadda ay u leedahay
dhallinyarada iyo horumarinta ciyaaraha dib u dayactirka Tuulada Ciyaaraha ee
Muqdisho Stadium oo dhawaan ay banneeyeen Ciidanka AMISOM.
C/raxmaan Diini, Hiiraan
Online
[email protected]
