Axad, October, 07, 2018 (HOL) – Madaxweyne
Muuse Biixi ayaa xafiiskiisa kulan kula yeeshay wefti ka socda dalka Ingiriiska
oo ay hoggaaminayso wasiiru-dawlaha dalka Ingiriiska u qaabilsan arrimaha
Afrika, ahna madaxa hay’adda horumarinta caalamiga ah ee DFID. Harriett
Baldwin.
Kulankan waxa madaxweynaha kula wehelinayey
madaxweyne-ku-xigeenka Somaliland, Mudane Cabdiraxmaan Saylici, wasiirka
arrimaha dibadda, Dr. Sacad Cali Shire iyo wakiilka Somaliland u fadhiya dalka
Ingiriiska, Ayaan Maxamuud Cashuur.
Markii uu kulankaasi dhamaaday waxa warbaahinta
la hadlay wasiirka Arrimaha Dibada Somaliland iyo wasiiru dawlaha dalka
Ingiriiska u qaabilsan arrimaha Afrika, kuwaas oo sheegay inay ka wada hadleen
mashaariicda horumarineed ee ka socda Somaliland ee gacanta ka gaysatay
Ingiriiska, wada hadalka Somaliland iyo Soomaaliya iyo doorashooyinka soo socda
ee la filayo inay ka qabsoomaan horaanta sanadka soo socda.
“Madaxweynaha iyo weftigu waxa ay ka wada
hadleen arrimo badan oo ay kamid tahay iskaashiga labada dal ee dhinacyada
iskaashiga, horumarka, nabadgelyada, kaabayaasha, doorashooyinka iyo
wada-hadallada Somaliland iyo Soomaaliya, wada-hadalkaasina si wacan buu u
dhacay, ingiriiskuna waa dawladda inoogu deeqda badan, aad iyo aadna waannu uga
mahadcelinayey deeqdaas uu Ingiriisku ina siiyo, waxana aannu isla meel-dhignay
inaynnu is-kaashigeennaa iyo wax wada-qabsigeennaas aynnu halkaas kasii
wadno.”ayuu yidhi wasiir Sacad oo dhankiisa ka hadlayey wuxuu daarnaa
kulankaasi.
Sidoo kale,Wasiiru-dawlaha dalka Ingiriiska u
qaabilsan qaaradda Afrika, Mis, Harriett Baldwin oo iyaduna ka hadlaysa waxay
ka wada hadleen madaxweynaha waxay tidhi “ maantana waxa aan indhahayga kusoo
arkay qaar kamid ah mashaariicda uu dalkaygu maalgeliyo ee loogu talo galay
dadka reer Somaliland. Sanduuqa horumarinta Somaliland (Somaliland Development
fund) waxa uu gacan siinayaa mashruuca biyo ballaadhinta Hargeysa, waxana aan
aad ugu faraxsanahay inaan maanta halkan kaga dhawaaqo bilowga wejiga labaad ee
mashruuca horumarinta Somaliland oo aannu ugu deeqaynno 25-Milyan oo bound oo
wax lagaga qabanayo kaabayaasha dhaqaalaha dalka Somaliland.”
Barkhad-ladiif M. Cumar, Hiiraan
Online
[email protected]
Hargeysa, Somaliland