Khamiis, October, 04, 2018 (HOL) –Maamul gobolleedka Galmudug ayaa eedeyn u
jeediyay aqalka sare ee Soomaaliya oo ay ku sheegeen in uu ku milmay
faragalinta dowladda dhexe ee ka dhanka ah Galmudug.
Wasiirka Warfaafinta Galmudug Maxamuud Aadan Cismaan (Masagawaa) ayaa
sheegay inay weli socoto faragelinta Madaxda dowladda Federaalka ku hayaan
Maamulka Galmudug, kaddib shir jaraa’id uu xalay ku qabtay Dhuusamareeb.
Wasiirka ayaa sheegay in Madaxda dowladda Federaalka ay
adeegsaneyso Aqalka Sare, iyadoo dhowaan Aqalka Sare war saxaafadeed ka soo
saartay xaalada ka taagan Galmudug.
“Waxaa wali soconaya faragelintii Madaxda
dowladda Federaalka ku hayaan arrimo hoosaadka dowlad goboleedka Galmudug, taas
oo hada qaadatay weji cusub, iyagoo adeegsanaya Aqalka Sare”ayuu yiri Wasiirka
Warfaafinta Galmudug.
Sidoo kale waxaa uu sheegay in Aqalka Sare ay ka
gaabiyeen gudashada waajibaadkooda dastuuriga.
Waxaan wali xal waara laga gaarin khilaafka Galmudug,
iyadoo labada dhinac ee kala fadhiya Cadaado iyo Dhuusamareeb ay isugu
jawaabeen xil ka qaadis iska soo horjeeda.
C/raxmaan Diini, Hiiraan
Online
[email protected]
