Axad, October, 28, 2018 (HOL) - Wasiirkii
hore ee Madaxtooyada Xirsi Cali Xaaji Xasan ayaa soo bandhigay buug uu ka qoray
hayaankiisa nololeed iyo mudadii uu siyaasadda ku jiray dhacdooyinkii uu la
kulmay.
Xirsi Cali Xaaji Xasan oo hadda ah hogaamiyaha
xisbiga mucaaradka ah ee WADDANI ayaa buugiisa kaga hadlay noloshiisi miyiga
iyo horumarka uu hadda gaadhay, waxaanu ka sheekeeyey nolol adag oo uu soo
maray iyo halka uu ka gaadhay siyaasadda oo uu ilaa hada ku jiro.
Buugan wuxu u bixiyey Miyi Ilaa Madaxtooyo:
Socdaalkeygii Guusha, taas oo uu kaga waramay waayihiisii nolosha iyo
siyaasada ee uu soo maray, waxaanu buugaasi dhaliyey dood iyo muran badan,
ka dib markii qayb ka mid ah buugiisa uu wax kaga sheegay caafimaadka
madaxweynihii hore ee Somaliland Axmed Maxamed Siilaanyo oo uu xusay inuu cudur
kaga dhacay xaga xasuusta iyo mar uu isku dayey inuu is casilo balse laga
diiday.
Xirsi Cali Xaaji Xasan ayaa shan sanno ahaa gacan
yaraha madaxweyne Siilaanyo, waxaanu ahaa dadka ugu dhow ee madaxweynaha, isla
markaana ugu awooda badan xukuumadda, waxaanay dadku ku dhaliilayaan in
madaxweynihii dadka baray ee awoodaasi siiyey inuu wax ka sheego.
Labadii maalmood ee u dambeeyey waxa baraha
bulshada lagaga doodayey buugaasi Xirsi oo dad badani ka falceliyeen, iyadoo ay
yar tahay dadka difaacaya buugga.
Xirsi wuxuu buugiisa ku qoray inuu nolol miyi iyo
duruufo adag uu ku soo korey, isla markaana shaqooyinka uu meelo hoose ka
bilaabay illaa markii dambe uu ka gaadhay shirkadii uu u shaqayn jirey inuu
maamulo, markii dambe uu siyaasada usoo digo rogtay oo uu ka gaadhay heer uu noqdo
wasiiradda ugu awooda badan golihii wasiirada ee wakhtigaasi. Sidoo kale waxa
uu sheegay inuu isagu wax is baray oo dadaalkiisa iyo kartidiisa uu wax ku
noqday, waxaanu sheegay in buugan ugu tallogalay inuu dhallinyarada ku
dhiirigaliyo si ay mustaqbalkooda u dhisaan.
Barkhad-ladiif M. Cumar, Hiiraan Online
[email protected]
Hargeysa, Somaliland
