Axad, October, 28, 2018 (HOL) -Wasaaradda
Horumarinta Beeraha Somaliland, ayaa Dallagii u horeeyey ee
dawladdu biirtay usoo go’ay, taas oo laga jaray Banka Wajaale.
Dallagan oo ah Qadami saddex bilood ka hor lagu
beeray Tog-wajaale, ayaa markii la soo jarayey waxaa ka qaybgallay Wefti uu
hoggaaminayey Wasiirka Wasaaradda Horumarinta Beeraha Md. Axmed Muumin Seed, oo
ay wehelinayeen Wasiirrada Wasaaradaha Xanaannada Xoolaha, Gaadiidka iyo
Horumarinta Jidadka, Wasiir ku-xigeenka Wasaaradda Qorshaynta, Isku-duwaha
Wasaaradda Beeraha ee Gobolka Gabiley iyo khuburro ka mid ah Wasaaradda
Beeraha.
Wasaaradda Beeraha ayaa soo goynta Qamadinkan oo
si Tijaabo ah loo beeray waxay u adeegsatay Cagaf Casri ah oo Goynaysa, kalana
saaraysa Midhaha, caleenka iyo wixii kale ee la socda, taasi oo aakhirkii
Midhihii Qamadinka oo haadsan ku shubtay meel loogu Talo-galay.
Qamadinkan sidii loogu talo-galay u baxay ee la
soo gooyey oo Wejiga koowaad u noqonaya Dalag-yada Wasaaradda Beeruhu ka qodday
Gobollada dalka ee sidii Qorshuhu ahaa u hirgalay, ayaa waxa faahfaahin ka
bixiyey Marxaladihii uu soo maray iyo Qorshayaasha horumarinta beeraha ee
Wasaaraddu waddo Mas'uuliyiinta Wasaaradda Horumarinta Beeraha, halka Wasiirrada
kale ee ka qayb-galay Munaasibaddaasina ay Wasaaradda ku bogaadiyeen dedaalka
ay waddo.
“Maanta waxaanu joognaa Qaybta Qamadinka ee Banka
Wajaale, Qamadinkani wuxuu ku soo baxay 2 bilood iyo 28 Maalmood, sidaa darteed
halkan waxa jooga Mishiinkii (Cagaftii) goynaysey.”ayuu yidhi agaasimaha
wasaaradda Axmed Cali Maax.
Wasiirrada Wasaaradaha Xanaannada Xoolaha,
Gaadiidka iyo Horumarinta Jidadka, Wasiir ku-xigeenka Wasaaradda Qorshaynta
Qaranka oo iyaguna halkaa ka ka hadlay ayaa Wasiirka, Agaasimaha guud iyo
Hawl-wadeennada Wasaaradda Beeraha ku bogaadiyey dedaalka ay ugu jiraan in
Dalku gaadho isku-filaansho dhanka Cuntada ah.
Xukuuumadan ayaa bilowday wax soo saarka dallaga
beeraha, isla markaana ballanqaaday inay dalka usoo saarto cunto ku filan,
iyadoo mashruucan wax soo saarka laga hirgaliyey laba gobol oo hada la sugayo
in la soo jaro.
Barkhad-ladiif
M. Cumar, Hiiraan Online
[email protected]
Hargeysa,
Somaliland.